MPCC Vice President in mipui ten INC Candidate an Vote a beisei thu a sawi
Inrinni kalta khan Serchhip Press Club-ah thuthar thehdarhtute kawmin MPCC Vice President Lalnunmawia Chuaungo chuan tun tuma India ram Lok Sabha Inthlanpui lo awm tur chu India rama Democracy chawinun zela atan a pawimawh tih Mizo mipui ten hria se a duh thu a sawi a. India ramah kum 10 chhung BJP kaihhruai sawrkar a din chungin India ram democracy chu nasa takin a hnungtawlh tih sawiin, Democratic Institution tam tak kan neih te tih bawrhban-a an awm thu leh Central sawrkar Agency tam tak hmansual niin Politics-a an khingpui te dikhlel taka rahbeh tumna hmanrua ah hman an ni tih a sawi a. BJP sawrkar chu an mangang nia sawiin, an tlin leh theihna turin hmanrua chi tinreng dapin hmanraw thianghlim lo te pawh an hmang tan nia sawiin, chung zingah chuan Congress Party chu Campaign thei lova phuarbeh an tum thu leh Congress Party sum neih te pawh hmang thei lo tura an bank Account a mi te pawh siam tuma hma an lak thu te a sawi a ni.
Hei bakah hian MPCC Vice President chuan BJP chuan inthlanna felfai leh thianghlima an khingpuite hmachhawn an huphurh nia sawiin, tunhma lama an Vote hmuhna thin ber loneitute chu sawrkar laka beidawnga an hawisawn tawh avang leh thalaite pawh sawrkar-ah an beidawn avangin tling zo turah an inngai tawh lo niin a sawi a. Hei bakah hian Central-a BJP sawrkar chu Kristian te nekcheptu, India ram chu Hindu ram-a siam tumtu an ni tih sawiin, heng te avang hian Lok Sabha Inthlanpui lo awm tur chu ‘Democracy hi chawinun zelin a awm dawn nge rahbeh in a awm dawn? Sakhaw zalenna kan neih te hi zawi zawia nekchepa awmin tihbo in nge a awm dawn a, rawngbawlna zau zawka kan neih leh theihna tur atana kawng hawngtu tur Congress leh a kaihhruai sawrkar kan din dawn?’ tih a nih thu a sawi bawk.
MPCC Vice President Lalnunmawia Chuaungo chuan Lok Sabha Inthlanpui ah MNF leh ZPM Candidate te kan Vote tling a nih chuan BJP tha tichaktu tur nia sawiin, Central-a BJP paihthlaka a awmna tura BJP tha chhattu tur chu Congress chauh an ni tih a sawi a. Hei vang hian Congress MP Candidate kan Vote theuh a ngai tih a sawi a. An Party Candidate Lalbiakzama chu Mizopa tak, a ropuina ang pawha mipuite pawhin an hriat lar loh a ni tih sawiin, sawrkar hna a thawh lai te pawhin hna pawimawh tak tak a lo thawh tawh thu te a sawi a, mi puitling leh rintlak a nih thu sawiin, lo Vote theuh turin mipuite chu a sawm bawk a ni.
Comments
Post a Comment