Tunkar Ningani atangin In lama Vote thlak kalpui dawn
Election Commission of India in ruahmanna a siam angin Mizoram Lok Sabha Inthlanpui neih turah hian AVSC (Senior Citizen, kum 85 chunglam) leh AVPD (Person with Disabilities, Vohbik) te chuan an In lamah Vote an thlak leh thei dawn a, In lama Vote thlaktute buaipuitu tura ruat Polling Official te tan hian Inrinni khan Serchhip DC Meeting Hall-ah Training neih a ni a, tunkar Ningani, April 11 atanga Inrinni, April 13 chhung khian heng Vote thlak turte hi an In kal chilhin Vote an thlak tir dawn a ni.
Serchhip District-ah hian In lama kum upa leh Vohbik Vote thlak turte buaipui tur hian Team 10 siam an ni a, Team tinah hian PRO pakhat leh PO pahnih zel dahin venhimna hna thawktute nen Vote thlak turte hi an In-ah kalchilhin Vote hi thlak tir an ni dawn a. Serchhip Bial-ah AVSC 80 leh AVPD 25, Tuikum Bial-ah AVSC 29 leh AVPD 10 bakah Hrangturzo Bial-ah AVSC 26 leh AV-PD 5 awmin Serchhip District pumah AVSC 135 leh AVPD 40 an awm a ni.
Heng bakah hian Essential Service-a puan, Election duty-a ruat ni lo leh Vote thlak ni-a an Office/hna-a Duty tura hotute’n an ruat leh Polling Station-a Vote thlak thei lo tur, Absentee Voters in Essential Service (AVES) te chuan Postal Ballot hmangin Vote an thlak thei dawn bawk a. AVES atanga Postal Ballot hmanga Vote thlak tur hi Serchhip Bial-ah awm lovin Tuikum Bial ah mi 2 leh Hrangturzo Bial-ah mi 2 bawk awmin Serchhip District pawn lama Vote thlak tur mi 7 an awm bawk a ni.
Lok Sabha Inthlanpui neih turah hian heng te bakah hian Inthlanna a Duty tur hrang hrangte pawhin Postal Ballot hmangin Vote an thlak thei dawn bawk a ni.
Comments
Post a Comment