Ruihhlo vangin mi 12 thi tawh

Kumin (2024)-ah January thla atanga March thla tawp thleng khan Ruihhlo (Heroin) vanga thi mi 12 an awm tawh.

Excise & Narcotics Department (END) chhinchhiah danin, Mizoram-ah kumin hian April ni 2 thleng khan ruihhlo vanga thi mipa 10 leh hmeichhia 2, an vaiin mi 12 an awm tawh a, an vaiin Heroin leh damdawi dang tihpawlh vanga thi an ni. Nikum 2023 chhung khan Heroin vanga thi hi mi 76 an awm a, chung mite chu mipa 64 leh hmeichhia 12 an ni a. Kum 1984 atanga chhutin Mizoram-ah ruihhlo vanga thi mi 1822 an awm tawh a, chung mite chu mipa 1601 leh hmeichhia 221 an ni.

END chuan kumin 2024-a thla thum, January ni 1 atanga March 31 inkar khan Heroin kg. 18.570 an man a, rakzu litre 16,829.035 leh sapzu litre 4,127.085 an man tawh bawk a. Heng bakah hian Zu bilh lai Tin 31,064, BEDC (Burma zu) litre 508.700, Beer litre 3,180.500 (um/bur 6,345), ganja kg. 381.076, Methamphetamine kg. 106.648 leh khuh damdawi bur 4,739 an man tawh bawk a ni.