Lenkawl

National Highway 54 laihzauh leh siamthat hna thawh meka kawngchhak lam leimin avangin Chhiahtlang Hmar Veng-a chhungkaw pakhat chenna In chu luah ngamloha awm mekin Inrinni khan In neitute bungrua pawh thiarchhuah a ni.

Tuialhthei phurhluh chungchanga harsatna a awm avanga Serchhip-ah Tuialhthei a harsat mek laiin nimin khan PB. Lalzuithanga Filling Station-ah Petrol leh Diesel a rawn thleng ve ve a, Vawiin lam hian a duh apiangte tan lak theih a ni tawh dawn a, bur/barel-a dawh erawh phal a la ni dawn lo thung nia thudawn a ni.

Nimin Pathianni, April 10, 2022 kha Kristian te ni pawimawh, Isua Krista Jerusalem-ah ropui taka a luhna ni, Tumkau Ni a ni a, he ni hi hri leng avanga kum 2 zet hman mumal theih a nih loh hnuah Kohhran ten urhsun taka hmangin Kohhran tam ber te chuan zingkar-ah Tumkau chawi-a kawng zawhin an aurual a, chhun leh zan lamah te pawh he ni puala a bik taka hun hman zui a ni bawk. Hriat theih chinah Presbyterian Church of India, Baptist Church of Mizo-ram, UPC NEI, UPC Mizoram, Salvation Army leh Roman Catholic te chuan he ni pual hian hun an hmang a ni.

Inrinni thleng khan Serchhip District-ah COVID-19 hri kai mi 13,486 hmuhchhuah an ni tawh.

Synod Prison Ministry te chuan Inrinni khan Serchhip District Jail rawn tlawhin District Jail a rawngbawlna neih dan tur chungchang District Jail Superintendent te nen an sawiho a. Thlarau lam rawngbawlna bakah Vocational Training neih chungchang te, Councelling Room mamawh dan leh tang chhuak, haw lehna tur nei nei mumallo te awm theihna tur, Rehabilitation Centre ang chi an mamawh dan te pawh he hunah hian sawiho a ni bawk.

Serchhip Sub-Hqrs. YMA Rorel Inkhawm chu tun thla ni 26-a neih turin sawn a ni.

National Highway-54 laihzauh hna thawh mekah Chhiahtlang Hmar Veng Branch YMA te chuan an Veng Volleyball Court bul nimin a laih tur chu helai hmun laihchhiat a nih dawn avanga zangnadawmna pek tur chu an la hmu lo nia an sawi avangin nimin khan KRAM Infracon Pvt. Ltd. te hnathawk tur chu an dang a, hei vang hian Company lam hian hna hi thawk thei lovin hemi chungchang hi Vawiin hian Chhiahtlang-a VC pahnih te leh Chhiahtlang Hmar Veng Branch YMA te chuan District thuneitute nen an sawiho dawn nia thudawn a ni.

Nimin khan Lawngtlai Vengpui tlangval 2, V. Lalsawmliana (28) leh B. Lalruatfela (30)  te chu Chhimtuipui lui, Tuipui Ferry-ah chesualin tui-ah an tlahlum a, an ruang hi hmuh nghal niin Vawiin ah vuiliam an ni ang. Thudawn danin heng mite hi tui-ah chengin V. Lalsawmliana hi a chebuai palh a, B. Lalruatfela hian chhan a tumna lamah an pahnih hian chesualin tui-ah hian an tla ve ve zui ta a ni.

BJP Siaha District chuan Mara Autonomous District Council (MADC) inthlanna neih tur April 5, 2022-a puan a nih hnuah April 9, 2022 khan Agriculture Office Siaha-ah Siaha Town chhung bik tan SEDP atangin Vaimim chi sem a ni tih thuchhuah siamin an tarlang a. Model Code of Conduct puan anih tawh laia MNF Flagship Prog-ramme SEDP sem a ni chu Election Commission zahlohna leh Model Code of Conduct bawhchhiatna a ni tih pawh sawiin, Election Commission-ah leh Mizoram People's Forum-ah Complaint thehlut tura hmalak nghal a ni tih an sawi bawk.

Inrinni thleng khan Mizoram-ah COVID-19 Vaccine Dose 15,37,718 pekchhuah a ni tawh a, mi 8,37,794 te chuan Dose 1-na la tawhin mi 6,72,785 te chuan Dose 2-na an la leh tawh bawk a, Precautionary dose pawh mi 27,139 pek ni tawhin nimin atang khan kum 18 chunglam te hnenah Precautionary dose pek tan leh a ni bawk.