Leimin vangin Chhiahtlang-ah In chhuahsan

National Highway 54 laihzauh leh siamthat hna thawh meka kawngchhak lam leimin avangin Chhiahtlang Hmar Veng-a chhungkaw pakhat chenna In chu luah ngamloha awm mekin Inrinni khan In neitute bungrua pawh thiarchhuah a ni.

Thudawn danin NH. 54 laihzauh mekah hian Chhiahtlang Hmar Veng huamchhunga nikum lama KRAM Infracon Pvt. Ltd. ten mual pakhat lo tan (laih) tawh chu tunhnai khan Company ten lai chhunzawm lehin laih zawh a ni a, hemi hnu hian a chhaklam ram chu rawn che in lei hi a tawlh hret hret a, hei vang hian a chhaklam a Vartluangkhuma te In, Assam Type  building chu luahzui ngamloh a awmin Inrinni khan khawtlang in an bungrua te an thiarchhuah sak a ni.

He In hi a dung ft. 24 leh a vang ft. 18 niin puitling mi 6 an cheng mek a, helai a In neitute chuan NH. 54 laihzauh leh siamthat ah ram lak turte lak fel a nih hnuah helai hmun ah hian In an sa tih sawiin, nikum March thla atanga sa tanin nikum November thla khan an In hi an luahluh thu an sawi a, kar hmasa Ningani khan lei hi rawn che tanin a rawn chet nasat zui tak avangin Inrinni khan an bungrua te hi thiarchhuah a nih tak thu an sawi a. An In bula Sabbath Kohhran Biak In-ah an bungrua te pawh an vawmlut rih tih an sawi bawk. Helai lei che avang hian Chhiahtlang Hmar Veng-a Forest Rest House awmna thin lam mual-a kawlphetha pekna line chu hlih niin nimin thleng khan lei hi ala che a, a thlanglam hi NH. 54 laihzauh mek niin leivung hi thenfai la remchang lo mah se lirthei tan erawh kaltlang harsatna a awm lo thung a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man