Lenkawl

Serchhip District-ah COVID-19 hri kai mi 678 enkawl mek niin hri kai enkawllai an tlem hret hret zel. Nimin khan Serchhip District-ah Rapid Antigent Test hmangin hri kai mi 27 hmuh an ni a, Serchhip-ah 20, Thenzawl-ah 5 leh East Lungdar leh Hmuntha-ah pakhat ve ve an ni. Inrinni khan Serchhip District-ah hri kai mi 88 hmuh an ni a, an vai hian Rapid Antigen Test hmanga hri kai hmuhchhuah te niin Buang-pui-ah 45 hmuh an ni a, Thenzawl-ah 21, North Mualcheng leh North Vanlaiphai-ah hri kai mi 6 ve ve leh Chhiahtlang leh Serchhip-ah hri kai mi 5 ve ve hmuh an ni bawk. Inrinni khan Serchhip District-ah hri kai enkawl dam mi 18 awm belhin nimin khan hri kai enkawl dam chhinchhiah belh an awm lova, heti hian Serchhip District-a hri kai hmuh tawh chu 8768 niin an zinga 8065 te chu enkawl dam an ni tawh a, hri kai hmuhchhuah atanga za zela 91.98 te chu enkawl dam ni tawhin enkawllai 678 an la awm a, mi 25 an boral tawh a ni.

UPC NEI-a Penticostal Youth Department (PYD) te chuan nimin Pathianni hmang khan Bial Inkhawmpui an hmang.

Serchhip Mat phai Tuisen Zau-a Leilet leh Nul panna kawng siamthat hna chu Zirtawpni atang khan bialtu MLA, Lalduhoma’n MLA Fund a pek hmangin thawh tan a ni a, he kawng hi Buh leh thlai phurhchhuahna kawng a nih bakah Zote South khaw panna atan pawh hman a ni bawk.

 Ministry of Jal Shakti hnuaia Department of Water Resources, River Development & Ganga Rejuvenation chuan National Water Awards (NWA) vawi 3-na chu semchhuakin tun tumah hian Category 11-ah State, Organisation leh mimal 57 hnenah Award hi sem a ni a. Best Village Panchayat (North-East Zone)-ah Ser-chhip District-a Sialsir chuan lawmman pakhatna an dawng a, Sialsir khua ah hian PHE Department hmalakna in tuihna tihpun leh a awmsa hum-halhna kawngah khawtlang mipuite nen kawng hrang hrangin hmalak a ni. Sialsir khua hi naktuk khian Central atangin Documentary Team ten a hmunah an rawn tlawh dawn a, Serchhip DC pawh an kawm nghal ang.

Thenzawl CHC-a Doctor thawklai sawn tura ruahmanna kal zelah Joint NGO Committee Thenzawl chuan Doctor an neih te a thlakna tur dah tel lova sawnchhuah tumna chu a tawp thlenga dodal zel an tum thu sawiin, Thenzawl-a Doctor sawnchhuahna tura Order tihchhuah chu nimin tlai khan an hal.

Consumer te i harh ang u XXXI : Electric hman man tihsan a ni leh dawn

MJA Conference hmanpui

ZPM Thalai chuan MNF Party chu an intiam tawh ang ngeia SEDP chu sem tura an phut thu an sawi.

Mizoram-ah COVID-19 hri kai hmuhchhuah an la pung zel a, hri kai hmuhchhuah zawng zawng pawh mi nuai khat leh sing sarih aiin an tam tawh a, hri kai enkawllai pawh an la pung zel a, hri kai zinga boral pawh mi 600 aiin an tam tawh.

Health Minister Dr. R. Lalthangliana chuan Mobile I-Lab (Infectious Disease Diagnostic Laboratory) chu a nihna ang taka hmang tan turin khawl mamawh a la kim lo deuh tih sawiin, heng te hi lei turin hma an lak mek thu leh reiloteah a nihna tur ang takin kan hman theih a rinawm tih a sawi.