TEACHERS’ DAY VAWI 63-NA (5th September, 2024) THUCHAH

TEACHERS’ DAY VAWI 63-NA THUCHAH

- Dr. Vanlalthlana, Minister

School Education Department,

Govt. of Mizoram

Kum tin-a kan hman thin ‘Zirtirtute Ni’ September 5, 2024 pualin Zirtirtute leh Zoram mipui te duhsakna chibai ka buk a che u.

‘Zirtirtute Ni’ ropui tak hi zirna ngaisang em emtu India ram President pahnihna, Dr. Sarvapalli Radha Krishnan piancham denchhenin kum 1962 atang khan hman tan a ni a, kumin hi vawi 63 kan hmanna a ni.

Zirtirtu hna hi a pawimawh em em a, nakin maia kan ram hruaitu la ni tur leh eizawnna kawng zawh thei tura zirlai naupangte kawng kawhhmuh a, nun kawng dik zirtirna hna ropui a ni a. Chuvangin, sawrkarin an pualin ni bik a siam hial a ni.

Zirna hmanga mihring hman tlak leh mi puitling chherchhuak tur hian sawrkarin theihtawp chhuahin sum leh pai pawh seng thin mah se, Zirtirtute inpekna tel lo chuan a hlawhtling thei thin lo. Vantlang mipui leh ram hmasawnna leh changkanna hi zirna ah a innghat a; chumi hnukpui ber leh innghahna laimu chu Zirtirtute an ni. Chuvangin, Zirtirtute Ni a lo thlen hian Zirtirtute hnenah lawmthu ka sawi a, anmahni kan ngaisangin kan chhuang em em a ni.

‘Zirtirtute Ni’ pual hian Zirtirtu natna khirhkhan tuarte tanpuina tur ‘National Foundation for Teachers Welfare’ (NFTW) Fund, zirtirtu zawng zawng te’n an thawhkhawm thin a. He Fund atan hian Zirtirtuten kum khat atan Rs. 200 an thawh thin a ni. Sum thawhkhawm atang hian kumin ah pawh Zirtirtu mi 157 hnenah Rs. 30,40,000/- tanpuina hi pekchhuah a ni. Tanpuina pek dan hi Category 3 (thum)-ah then a ni a, Mizoram chhung Damdawi In-a inenkawlte hnenah Rs. 20,000/-, State pawn Damdawi In-a inenkawlte hnenah Rs. 30,000/- leh State chhunga General illness avanga Hospital-a admit-te tan Rs. 10,000/- pek thin a ni. NFTW Fund atanga tanpuina pek hian inthliarhranna awm hauh lovin Sawrkar School leh Private School-a thawk Zirtirtute a huam vek a ni. 

  Mizoram Sawrkarin Zirtirtu tha leh chawimawi tlak te hnenah kumtin ‘State Award’ a hlan thin a; kumin ah pawh India Independence Day August ni 15, 2024 khan Zirtirtu chhuanawm tak tak mi 4 te hnenah State Award hi pek an ni a, chung mite chu:- 

1) Pu R.C. Lalruatchhunga, Lecturer, Govt. Zemabawk HSS

2) Pu Zothanliana, Teacher, Govt. Chaltlang H/S 

3) Pu C. Lalhrilliana, Teacher, Govt. Champhai Vengthlang M/S

4) Pu T. Lalramnghaka, Headmaster, Govt. Selchhunga P/S, Saitual-te an ni.

Chawimawina dawngtute chungah Mizoram sawrkar aiawhin lawmthu ka sawi a, an hmalam hun lo kal zel turah duhsakna sang ber ka hlan bawk a ni. 

  National Award to Teachers chu kumin 2024-a dawng thei turin mi 3 rawt an ni a, chung zingah chuan Joseph Vanlalhruaia Sailo, Lecturer, Synod HSS chu National Award hmu tur hian thlan a ni a, rampum huap chawimawina sang dawng thei kan nei hi a lawmawm em em a, Mizoram sawrkar aiawhin lawmthu ka sawi a ni. Award hian Cash Award, Citation leh Medal te a keng tel a ni. 

  Zirtirtu hnathawk tha te mai bakah Zirlai titha Topper-te hnenah Chief Minister’s Award pek thin a ni a, kum 2024-ah CM Award hi heng mite hnenah hian pek an ni:-

1. Lalmawipuia Lawmzual, HSLC Topper

2. Linden Lalremruatpuia, HSSLC Topper (Arts)

3. David Lalhminghlua, HSSLC Topper (Commerce)

4. Lalramdina Ralte, HSSLC Topper (Science)

Mizoram sawrkar hian zirna hi ram leh hnam hmasawnna bulthut a nih avangin a ngai pawimawh em em a, zirna tihhmasawn nan theihtawp a chhuah mek a ni. Zirtirtu indaihlohna phuhhruk nan January, 2024-ah Casual Teacher 1370 (350 H/S + 371 M/S + 649 P/S) lak an ni a. Office Staff hi 10 (UDC) January, 2024 ah lak a ni bawk. School Education Department Adult Education hnuaiah mi 137 te’n eizawnna nghelnget din nan training tha takin an zo bawk a ni. Tunhnaiah School 113 te chu siamthat leh siam thar an ni a. He hnathawh hi la chhunzawm reng a ni. Pre-School naupang te tan Mid-Day Meal chu telh thar a ni a, kum 2023-24 chhungin he Scheme hi School 2499-ah hman nghal a ni.

Naupangten harh vang tha tak leh hrisel taka sikul an kal theih nan, sawrkarin chawchhun pek kawngah nasa takin tan a la chho zel a. Heng an chawchhun ei te hi taksa hriselna atana him leh tha a ni em tih pawh a theih ang angin enfiah thin a ni.

Zirtirtute hi zirlaite tan chuan kawng hrang hranga thiamna petu an nih avangin, zirlaite chuan zirtirtute nungchang an entawn a, an lachhawng mai zel a; chuvangin, kan ram thalai leh zirlaite hi ruihtheih thil laka an lo fihlim deuh deuh theih nan Zirtirtu zawng zawngte chu ruihtheih thil laka inthiarfihlim turin ka chah tak meuh che u a ni. Zirtirtu hna hi hna thianghlim a nih avangin Zirlaite mai bakah mipui vantlang tan pawha entawntlak leh mi rinawm ni turin ka ngen bawk che u a ni.

A tawp berah chuan Zirna hi mihring hman tlak, chhawr tlak, eizawnna leh thiamna hmanga mahni ke-a ding thei tura inbuatsaihna a ni a. Zirlaite chu khua leh tui tha, khawtlang leh ram tana rotling ni tura chherchhuah hi zirnain a tum pawimawh ber a ni. Chuvangin, ‘Zirtirtute Ni’ vawi 63-naah hian Zirtirtu zawng zawngte kan thlen chin atanga hmasawn a, Zofa chhuan lo la awm zel turte tan kan thiamna leh theihna hlan thar theuh tur leh inpekna thar nena thawk chhunzawm zel turin ka ngen tak meuh meuh a ni.

Kan Zirtirtute hi Ram leh Hnam hmasawnna leh changkanna kawng min zawh tirtu an ni a, chawimawi an phu a, i chawimawi zel ang u.