Tribal te hian India ram zalenna atan an theihna sang tak an lo hlan tawh - Governor

Mizoram Governor Hari Babu Kambhampati chuan Tribal te hian India ram zalenna atana zalenna sual a nih lai khan an theihna sang tak an lo hlan tawh tih a sawi.

India ram hmundang te rualin nimin khan Aizawl Chanmari YMA Hall-ah Janjatiya Gaurav Diwas 2022 hman niin he hunah hian Governor Hari Babu Kambhampati chuan Tribal te pual liau liaua ni bik, India sawrkarin a buatsaih chu lawmawm a tih thu a sawi a. Tribal te hian India ram zalenna atana zalenna sual a nih lai khan an theihna sang tak an lo hlan tawh tih sawiin, “India ram ropuina leh hmasawnna atan Tribal te an thawh hlawk em em a ni,” a ti a. India sawrkar pawhin Tribal te a dah pawimawh zia chu India President atan Tribal hmeichhia a ruat atang hian a chiang hle a ni, a ti bawk.

Lalnu Ropuiliani chanchin a hriat tawh thin thu  Governor chuan sawiin, a huaisenna leh a inpekna chu ropui a tih thu a sawi a. Mizo lal te leh an khua leh tui te khan Kumpinu Sawrkar rorelna dodalin an lo do thin a. Kha kha Freedom fighter kan tih tak te pawhin an hmalak dan a ni, a ti a. Chuvangin thangtharte chu an pi leh puten zalenna an sual a ni tih hriaa inchhuang turin a chah. Governor chuan Janjatiya Gaurav Divas chu Tribal te nunphung leh khawsak dan chawimawina ni a ni nghal bawk tih sawiin, Mizoram-ah pawh hnam zia leh hnam thil te uluk takin vawnnun chhunzawm a ni zel chu tha a tih thu a sawi bawk.

He hunah hian Social Welfare & Tribal Affairs Minister Dr. K. Beichhua pawhin Tribal te pawimawhna hriaa India Sawrkarin Tribal te puala ni bik a siam chu lawmawm a tih thu a sawi a. India ram ropui takah hnam chi hrang hrang kan khawsa za a, heng zingah hian Tribal te pawh hi India ram tiropuitu leh tifamkimtu kan ni a. India in zalenna a sual pawh khan Tribal zingah Santhal, Bhil, Khasi, Naga leh Mizo te bakah Tribal hnam tam takin British Sawrkar kha an dodal a. India zalenna sualtute zingah pawh Tribal mi huaisen leh langsar tak tak awmin Birsa Munda pawh hi chung ho zinga mi chu a nih thu a sawi a. Zalenna sualtu a ni mai lova, Tribal mite dinhmun chawisanna kawngah sulsutu a nih bawk thu a sawi a ni.

Kumtin November 15 hi Janjatiya Gaurav Divas emaw, Tribal Pride Day tia hriat niin he ni hi Tribal Mihrat khawkheng leh zalenna sualtu Birsa Munda hriatrengna leh chawimawina puala hman thin a ni a. Tribal te India ram Culture a an pawimawhna leh India ram tana an hnathawh ropui tak te chawimawina ni a ni bawk a. Kumin hian Cultural Programme atan he ni hi hman a ni.

Comments

Popular News (Last 30 Days)

LPG man bithliah thar