Lenkawl

Cheng nuai 240 vel zet senga sak Serchhip Darnam Tlang-a Serchhip DTO Office leh Maxi Cab Terminal Building tur sak hna chu zawhfel thawkhat niin hun reilote ah hawn beisei a ni.

Serchhip District Hospital sak tura hmalakna kal mekah NGO Coordination Committee (NGOCC) duhdan anga sawrkar in hma a lakna te tawiawm turin Joint Committee din a ni ve leh ta.

Thenzawl Zone Football Association (TZ-FA) buatsaih ‘MLA Cup 2022’ chu Vawiin hian Thenzawl-a Lothazawl Playground-ah Final khela zawhfel a ni dawn a, Thenzawl West VC leh Thenzawl East VC ten Final an khel ang. Semi Final-ah Thenzawl West VC hian Neihloh VC chu 3-1 in an hneh a, Thenzawl East in P&E FC Serchhip chu 2-0 in an hneh bawk a ni.

Serchhip Vengchung Pastor Bial Pavalai Pawl Intawhkhawm Vawi 8-na chu Zirtawpni zan atanga nizan thleng khan Serchhip Bazar Kohhran Biak In-ah neih a ni a, ‘I chhungkua ngaihtuah mai rawh’ (II Chr. 10:16) chu thupui atan hman niin Speaker atan Rev. H. Lalmuanchhana chu hman a ni. Serchhip Vengchung Pastor Bial Pavalai Pawl Intawhkhawmna ah hian Zirtawpni zan khan Report hrang hrang ngaih-thlak niin member boral te sunna hun hman a ni a, Inrinni khan intihhlimna hun hman leh a nih hnuah zan lam atangin inkhawm apiangin Speaker hnen atangin thuchah ngaihthlak thin a ni. Vengchung Pastor Bial chhungah hian Kohhran 5-ah Pavalai Pawl hi dingin Member 350 vel an awm a ni.

Nimin tlai thleng khan Serchhip District-ah COVID-19 hri kai enkawllai mi 4 an la awm.

Chief Minister Zoramthanga chuan Inrinni khan Aizawl-Reiek-W. Lungdar kawnga BUG Bridge dawh hna thawh mek chu a enfiah a, he Lei ft. 180.40-a thui double Lane-a dawh hna hi Central Roads Fund atanga sum hmuh hmangin Sadguru Engineer & Allied Services Pvt. Ltd. ten an thawk mek a, harsatna eng engemaw avangin a hun taka zawh theih a ni lova, CM hian an harsatna te ngaithlain, Contractor te hi February ni 28, 2023-ah hna zo turin an intiam a ni. Chief Minister hian Reiek a PWD hmun leh Agriculture Office hmunhma te a tlawh nghal bawk.

Peace Accord MNF Returnee Association (PAMRA) General Hqrs. chuan Peace Accord avanga MNF Returnees’ te tana Mizoram Sawrkar-in Chaltlang Ram Maumual-a In hmun a pek mumal leh felfai zawka cheibawl tuma Mizoram sawrkar in hma a lak avang leh Mau-mual House Site Plan Committee a din chu lawmawm an tih thu thuchhuah siamin an tarlang. October 11, 2022-a din Development Committee for MNF Returnees-ah hian Minister Lalruatkima chu Chairman niin Member Secretary-ah Director LR&S chu ruat a ni bawk.

Lunglei DC Office kum 50 tlin lawmna (Gol-den Jubilee) chu Zirtawpni khan Lunglei-a Convention Centre-ah neih a ni a, he hun hi Agriculture Minister C. Lalrinsanga chuan khuallian nia hmanpuiin Lunglei DC Office Complex-a Jubilee Monument chu a tlangzarh hnuah a lawmna inkhawm hi neih a ni a, Lunglei HPC Vice Chairman Lawmawma Tochhawng leh Lunglei DC Kulothungan A te pawhin thu an sawi a ni.

MZP General Headquarters hruaitute chuan Zirtawpni tlai khan an President Lalnunmawia Pautu hovin Chief Minister Zoramthanga chu a Office-ah hmuin Post Matrict Tribal Scholarship 2021-2022 (3rd Installment) Central atanga Mizoram sawrkar kuta thleng tawh sem chhuah a nih mai loh chungchang sawipuiin, sem chhuah a nih thuai theih nana hma la turin an ngen nghal a. Chief Minister chuan Tribal Scholarship sem hma bak sem thuai an tum thu sawiin, Principal Secretary Finance Department Vanlalchhuanga IA&AS pawh be nghalin a rang thei ang bera sem a nih tur thu an sawi a ni.

Kar hmasa khan Central YMA hruaitute chuan NHIDCL Executive Director Jhakar chu a Office, Aizawl Tuikhuahtlang-ah kawmin Mizoram hmun hrang hranga kawng an siam mek te tha taka siam anih theih nan Quality ngai pawimawh tura an ngen bakah National Highway siam mek te chak zawka hmalak anih theih nan tan la turin an ngen a Leimin leh kawng siam hna chaklo in zin veivak te tan harsatna a thlen dan te an hrilh bawk. NHIDCL Executive Director chuan YMA hruaitute thu thlen chu alo ngaih pawimawh tur thu leh kar khat chhunga ruah a sur loh chuan hmala fel hman turin tan an lo lak tur thu a lo hrilh a, kawng siam chungchanga harsatna an tawh te pawh YMA hruaitute hnenah hian sawiin, a theih anga tan lak a sawiho zel nise an ti bawk.