NGOCC duhdan anga sawrkar hmalakna tawiawm turin Joint Committee for District Hospital, Serchhip din a ni

Serchhip District Hospital sak tura hmalakna kal mekah NGO Coordination Committee (NGOCC) duhdan anga sawrkar in hma a lakna te tawiawm turin Joint Committee din a ni ve leh ta.
Zirtawpni kalta October 14, 2022 khan New Serchhip North VC huaihawtin New Serchhip North VC Hall-ah Serchhip District Hospital sak that tur chungchang sawihona hi neih a ni a, he hunah hian New Serchhip leh Chhiahtlang-a Village Council leh NGO aiawhte an tel tih kan thudawnna chuan sawiin, he Meeting hi New Serchhip North VCP Lalrotluanga chuan a kaihruai a, he hunah hian Lawmzuala, New Serchhip leh C. Lalrawna Chhiahtlang North VCP te chuan Serchhip District Hospital Building sak thatna atana hmalakna awm tawh dan leh harsatna awm mek te an tarlang a, sawihona neih zui a ni.

He Meeting hian NGOCC rawtna anga Bukpui ram-a Hospital sa tura ruahmanna a kal hnuah P&E Minister leh Chief Minister te pawhin a hmun ah ngei enin Hospital sak nan Bukpui ram chu tha an tih thu an puang tawh tih sawiin, CSR Fund atanga cheng vbc. 21 dawn tur bakah Sawrkar ruahman angin Department hrang hrang ten Hospital building bak senso tur tul ang te Estimate siamin an thehlut tawh bawk tih an sawi a. JAC for Hospital Site ten Building lianpui, a behbawm tul dang awmloh vanga hman theih si loh neih an hlauh thu sawrkar-a an thlen anga Chief Minister in SACSI Fund atanga cheng vbc. 13 pek belh tura a tiam hnuah pawh a hmun thu ah harsatna siam ala ni reng chu pawi an tih thu an sawi a. Chuvangin tluang taka Hospital building sak anih theih nan NGOCC duhdan anga sawrkar in hma a lakna te tawiawm turin Joint Committee din an rel zui a ni.

Joint Committee for District Hospital, Serchhip-ah hian Chairman-ah C. Lawmzuala (New Serchhip South) chu ruat niin Vice Chairman-ah MJ. Zakunga (Chhiahtlang South); Hmangaihzuala (P&E Veng) leh T. Vanlalhnaia (New Serchhip South); Secretary-ah H. Lalrinawma (Chhiahtlang South); Joint Secretary-ah Rualzakhuma (New Serchhip North) leh Lalduhawma (Chhiahtlang North) bakah Treasurer-ah Lalfakzuala Sailo (Bukpui) te ruat an ni a. Heng bakah hian NGO leh VC aiawhte chu Adviser leh Executive Committee Member atan ruat an ni bawk.