Lenkawl

Nimin khan Mamit-ah hmeichhe baihvaite tlukluh lailawkna tur 'Sakhi - One Stop Centre' chu District Bawrhsap, Dr. Lalrozama IAS chuan a hawng.

Serchhip-a Fire & Emergency Service in an chhinchhiah danin kum 2016 atanga kumin kum kal mek thlengin Serchhip-ah kangmei chhuak tum 37 a awm a, heng zinga 16 te hi In kang niin kumin ah In kang 3 chhinchhiah a ni.

State Institute of Rural Development and Panchayati Raj (SIRD&PR), Mizoram buatsaih Serchhip District chhunga VC, tlawmngai pawl, Self-Help Group leh Vidhayak Adarsh Gram Yojana (VAGY)-a Women Organisation ten sawr-kar laipui hmalakna hrang hrang an hriatchian theihna tura zirhona ni 3 chhung neih tur chu nimin khan DPRC, Serchhip-ah neih tan a ni a. He Training-ah hian Vanlalhruaia Ralte, Head Faculty, DPRC Serchhip leh K. Lalbuatsaiha, Head Faculty, ETC Thingsulthliah te chu Course Director atan hman niin nimin khan SAGY kal-pui mek chungchang leh Mizoram-a he hmalakna kalpui tawh dan te zirho a ni.

Serchhip District Executive Force te tana Disaster Management Training neih mekah nimin khan North Vanlaiphai Police Station-a thawk te tan Disaster Management Training neih a ni.

 India ramchhung Damdawi In te faina leh thianghlimna inelna, Kalyakalp chu kumin atan kalpui leh mek niin endikna hmasa neih zawh a nih hnuah nimin khan kumin a endikna hnuhnung ber tur neih leh niin Serchhip District Hospital chu rawn enfiah a ni a. Nimin-a Serchhip Hospital endikna ah hian Dr. Lalramliana, Deputy Director Health Superviser leh Dr. Lalchhuan-awma, State Nodal Officer, Quality Consistent te rawn kalin Serchhip District Hospital in faina leh thianghlimna kawnga hma an lakna te endikin thawktute an kawm bawk a ni.

Information & Public Relations Minister, Lalruatkima chuan nimin khan Ramhlun Indoor Stadium-ah R .Chaldailova lehkhabu ziah ‘Mizo Pi Pute Nunkhua’ tih chu a tlangzarh.

Tourism Minister, Robert Romawia Royte chuan Kolkata khawpuia Zo chi peng hrang hrangte huapin Zokutpui buatsaih tum a ni, a ti.

Sinlung Hills Council sawrkar thar lawmna chu nimin khan Sakawrdai-ah neih a ni a, he hun hi Chief Minister, Zoramthanga chuan khuallian nia hmanpuiin Chief Minister chuan Sinlung Hills Area hmasawnna turin State sawrkarin theihtawpa a puih tur thu a sawi.

Aizawl Municipal Corporation (AMC) chuan Aizawl khawpui-a Plastic hman tlem leh khap an kalpui mek bawhzuina chi khat atan nimin zing khan Aizawl khawpui-ah zirlai naupangte tan ‘Plastic Free City Rally’ an buatsaih.

Hmeichhe pakhat pasal nei lai pawngsualtu, J. Lalruatsanga s/o Lalzoa, R. Vanhne, Siaha District chu Joel Joseph Denga, District & Session Judge Lunglei chuan kum 20 chhung lung In tang tur leh pawisa chawi turin a chungthu a rel sak.