Kum 2016 atanga kumin thlengin Serchhip-ah kangmei chhuak tum 37 chhinchhiah a ni

Serchhip-a Fire & Emergency Service in an chhinchhiah danin kum 2016 atanga kumin kum kal mek thlengin Serchhip-ah kangmei chhuak tum 37 a awm a, heng zinga 16 te hi In kang niin kumin ah In kang 3 chhinchhiah a ni.
Serchhip DIET-a zirlai naupangte chuan an zirlai peng pakhat atan Project Report siamin he Report hi nimin khan an tlangzarh a, he Report-ah hian Fire & Emergency Services ten kangmei chhuak report an dawn leh kangmei thelh tura an chhuahna chin tarlan niin he Report-a tarlan a nih danin kum 4 kalta, kum 2016 atanga kumin 2019 thleng hian kangmei chhuak hi 37 chhinchhiah niin heng zinga 16 hi In kang niin Motor kang 3 a awm a, bawlhhlawh paihna hmun kang 4 leh ramkang hmun 7-ah a awm bawk a ni. Chenna In kang chhinchhiah ah hian kum 2016-ah In kang 3 chhinchhiah a ni a. Kum 2017 leh 2018-ah In kang 5 ve ve chhinchhiah ni bawkin kumin kum kal mekah hian In kang 3 chhinchhiah a ni bawk a. Heng In kang an chhinchhiah te hi In kangral vek te niin lovin a then chu a kan nasat hmaa thelh te pawh a awm a ni.
Kum 4 kalta chhung hian Fire Department te chet chhuahna lirthei kang tum 3 chhinchhiah te hi kum 2017-ah tum 2 leh kum 2019-ah tum khat a ni a, bawlhhlawh kang thelh tura an chetchhuah hi kum 2017 leh 2019-ah tum khat ve ve awmin kum 2018-ah tum 8 a awm a. Ram kang thelh tura chetchhuah hi kumin-ah ngah berin tum 7 zet an thawkchhuak a, nikum (2018)-ah tum 5 leh 2017-ah tum 2 an chhuak bawk a ni.
He Report-a tarlan a nih danin kangmei chhuak zinga a tam zawk hi mihring siam chawp (Man made) niin kangmei chhuak zinga 18 zet hi mihring siam chawi nia chhinchhiah a ni a, khuarel chhiatna avanga kangmei chhuak tum 10 awmin chhan dang vanga kangmei chhuak tum 9 a awm bawk a. He zirchianna neitute chuan kangmei laka mipuite kan him theih nan mipuite hnenah nasa lehzuala inzirtirna neih tul an tih thu leh kangmei chhuak thulh ah mipui ten kawngpui tichep lo zawnga kan bungrua dah tul an tih thu bakah kangmei chhuahna hmun pawh kangmei thelhtute hian a rang thei ang berin thleng thin se an duh thu te pawh an tarlang a ni. Fire Department hi New Serchhip-ah awmin thawktu mi 9 an awm a, kang thelhna Motor pahnih an nei a ni.

Comments

Chhiar Hlawhte