One Stop Centre hawng

Nimin khan Mamit-ah hmeichhe baihvaite tlukluh lailawkna tur 'Sakhi - One Stop Centre' chu District Bawrhsap, Dr. Lalrozama IAS chuan a hawng.

Ministry of Women and Child Development, Social Welfare Department, Govt. of India bultuma Mamit-a Sakhi One Stop Centre hawnna hunah hian District Bawrhsap chuan Mamit tana a vawikhatna tur, Sakhi One Stop Centre hawn a ni ta chu thillawmawm tak a nih thu a sawi a, OSC hawn a nih theih nana ngaihtuahna sengtu zawng zawngte chungah lawmthu a sawi. Sakhi One Stop Centre chu hmeichhia hleilenna chi hrang hrang avanga harsatna tawkte tana lungmuang taka an hahchawlhna tur a nih angin hetiang harsatna neite chuan inthlahrung miah lova, taksa rilru damna an chan ngei theihnana pan turin a sawm a. Chutihrual chuan Hmeichhiate dikna leh chanvo zahsak chunga manganga helai hmun pan ngailo tura siamtu nih tum theuh turin kalkhawmte a sawm a ni.

He hunah hian Mamit SP, Shashank Jaiswal IPS pawhin thusawiin Mamit tana chhinchhiah tlak ni tura Sakhi One Stop Centre hawn a ni ta chu hmasawnna leh thil lawmawm tak a nih thu a sawi a. India ramah Hmeichhia te'n chhan hrang hrang avangin harsatna an tawk thin tih sawiin, India Sawrkar chuan Hmeichhiate dinhmun chawikana tanpui chu a ngai pawi-mawh hle a ni, a ti a. Sakhi One Stop Centre-a thawktute chu Police te nena thawhhona tur tulah englai pawha an in hawn reng thu a sawi bawk.

Sakhi One Stop Centre hawnna hun hi Lalrinpuii District Programme Officer, ICDS chuan kaihruaiin Lalruatpuii, District Centre Administrator, One Stop Centre, Mamit chuan OSC in a tum leh hnathawh tlangpuite a tarlang a, he Centre pantute tan hian ni leh zan 5 a awm theih dawn a, Fa nei tan pawh an fate hruai tel theih a nih dawn thu a sawi bawk.