Sinlung Hills area hmasawnna turin state sawrkarin theihtawpa a puih tur thu Chief Minister in a sawi

Sinlung Hills Council sawrkar thar lawmna chu nimin khan Sakawrdai-ah neih a ni a, he hun hi Chief Minister, Zoramthanga chuan khuallian nia hmanpuiin Chief Minister chuan Sinlung Hills Area hmasawnna turin State sawrkarin theihtawpa a puih tur thu a sawi.

Sinlung Hills Council (SHC) sawrkar thar lawmna nimin-a Sakawrdai Playground-a neih hi bialtu MLA leh Education Minister, Lalchhandama Ralte chuan kaihruaiin Chief Minister, Zoramthanga chuan Sinlung Hills Council-ah hun rei tak Interim Council a din hnua inthlanna hlawhtling taka zofel a, Council din a ni ta chu lawmawm a tih thu a sawi a, Sinlung Hills area hmasawnna turin state sawrkarin theihtawpa a puih tur thu a sawi a. An hmabakah hmasawnna ruangam duan tur tul tam tak a awm thu sawiin, a remchan dan ang zelin kawng tha te, Office leh zirna In leh Health Care lamah te hmalak a nih tur thu Chief Minister chuan sawi a. bawk.
Chief Minister chuan Sinlung Hills area mai nilo, Zoram pum thlirin hmasawn tura ngaihtuahna dik mipuiin kan neih tlan chu thil pawimawh tak a ni tih sawiin, “Malsawmna hailuhna turin ram pek kan ni a, chumi tur chuan kan inpeih a ngai a ni,” a ti a. Ram zau tha tak, ruahtui thatna, sik leh sa nuam a cheng kan ni tih sawiin, intodelh mai bakah State pawn-a hralhchhuah tur nei thei tura malsawmna kan chan te hi hausakna atan kan hman a tul thu a sawi a. Chumi atan chuan SEDP kaltlanga hmalak a nih tur thu leh mipui tawiawmna a pawimawh thu a sawi bawk.
He hunah hian Khual Zahawm Assembly Speaker, Lalrinliana Sailo chuan bul tan that a pawimawh thu sawiin, dikna leh rinawmna chhawmnung turin Sinlung Hills Council sawrkar thar fawng vuantute a chah a. Hmasawnna tur sum, development fund lo kal turte leh Staff thawktu tur lak chungchangah te tha taka bul tan ni se tiin, a hmanna tur dik taka hmang a, a mamawh leh phu tak tak te hnen thleng ngei se tiin a chah a. Hmasawnna tak tak hmu tur chuan tanrual leh thawhho a tul thu a sawi bawk.
He hun kaihruaitu bialtu MLA, Lalchhan-dama Ralte chuan mipuiten Pathian rawn chunga hruaitu tur an thlantlinte chu theihtawpa an tawiawm leh an tawngtaipui a ngai dawn tih sawiin, Sawrkar bul tan tur, rahbi tukchawp tur an nih dawn avangin mipuiten an theihna zawng zawnga an thlawp leh thawhpui a ngai dawn a ni, a ti.
Sinlung Hills Council-a CEM thar, Lalthlamuana Hmar chuan Council siam thei a mipuite tawiawmna chungah lawmthu sawiin, tha taka hma la turin mipuite tawiawmna an mamawh thu a sawi bawk.

Comments

Chhiar Hlawhte