Lenkawl

Lawngtlai-a MFA Cup khelh mekah FC Serchhip Kawnpui te chu nimin khan an chak lo leh a, Semi Final luh beisei theih a ni tawh lo.

Election Commission of India chuan India ram danpui (Constitution of India) Article 324 hnuaia thuneihna a pek anga thupek a chhuah angin Serchhip District Bawrhsap chuan Serchhip District-a Media Certification & Monitoring Committee (MCMC) ni phaina a pe (pre-certified) a nih loh chuan, Lok Sabha Inthlanpui neih tura vote thlak ni (19.04.2024) leh vote thlak hma ni (18.04.2024)-ah Political Party, Candidate, pawl leh mimal ten Print Media kaltlangin Politics kaihhnawih Advertisement chu Serchhip District chungah an tichhuak tur a ni lo tih a tar-lang a. Political advertisement tichhuak duh chuan an tihchhuah duh ni (date) hma ni hnih (2 days) aia tlai lovah MCMC hnenah dilna an thehlut ngei ngei tur a ni tih a tarlang bawk.

Mizoram-a zirna In hrang hrang te Academic Session thar atana hawn a nih hnuah tunkar hian naupangte hnenah Zirlaibu sem tur pekchhuah hman beisei a ni.

Tunhnaia Mizoram-a Ruah sur nasa leh hemi kaihhnawiha thli leh rial tla avanga In chhe zawng zawng chu 2938 a tling tawh.

Aizawl SP Rahul Alwal chuan nimin khan Aizawl khawpui chhunga Village Defence Party (VDP) hruaitute kawmin Ruihhlo leh Dan bawh-chhiatna dona kawnga thawhhona tha an neih theih dan tur an sawiho a. Aizawl SP chuan Police te tha taka thawhpui chhunzawm tura sawmin, VDP-te hnathawh/thawh dan a zirin ‘Best VDP of the Month’ leh ‘Best VDP of the Year’ te chu lawmman pek a nih tur thu a sawi bawk.

Champhai Sub-Hqrs. YMA Rorel Inkhawm vawi 8-na chu nimin khan Hmunhmeltha Community Hall-ah neih a ni a, Chawhma lama Report hrang hrang ngaihthlak a nih bakah Member boral sunna hun an hmang a. Chawhnu lama an thurel zingah Tleirawl leh rawlthar te Zonun zemawi inzirtir leh Indo-Myanmar ramri hung a nih lohna tura hmalak te a tel a ni.

Lok Sabha Inthlanpui neih tur atana inbuat-saihna kal mek enpuiin Mizoram Chief Electoral Officer Madhup Vyas chuan nimin khan Kolasib District a tlawh a, Kolasib DC Conference Hall ah Election kaihhnawih a Nodal Officer leh Sector Magistrate-te thutkhawm neihpuiin mipui aiawh thlanchhuahna tura vote thlak ngaih pawimawh kawngah State dangte entawntlak, ‘Model State’ ni tura tan lak a pawimawh thu sawiin, Kan aiawha rorelna sang a ding tur thlanchhuahna a vote thlak thei nih a hlut zia inzirtir a tul thu leh vote thlak zat dik tak hriat theih nan Electoral Roll uluk taka ennawn leh vawnthat a ngaih thu a sawi bawk.

Mizoram Police leh NIT Mizoram-te tang-kawpiin a an buatsaih ni thum awh tur, National Level Hackathon event – ‘Hackventure 2.0’ chu nimin khan neih tan niin Mizoram DGP Anil Shukla IPS chuan Aizawl-a Police Hqrs. Arya Mess-ah a hawng a. DGP chuan Hackathon event hi Mizo-ram Police-te leh mipui inkara inkungkaihna tha zawk siamna tur atan mai bakah tunlai thiamna thar ber ber hmanga kawng hrang hranga Police hna pui theihna tur atana thalai ho thiamna, finna leh hriatna sawrchhuaha hmanchhuah theihna tura buatsaih anih thu a sawi a ni. Hackathon in a tum ber chu Mizoram Police-in IT Product an mamawh tur duanchhuah niin he contest hian Police tana tangkai tur, IT lama ruahmanna mai bakah idea hrang hrang tuaihnum a hman tak tak theih tur chherchhuah a tum a ni.

MNF Vice President leh Assembly House-a Opposition Leader Lalchhandama Ralte chuan ZPM sawrkar chu Calcutta High Court lakah a mualpho nia sawiin, “Kolkata Mizoram House chungchangah mipui bum an tumna laihlan sak a ni,” a ti.

Mizoram Lok Sabha Inthlanpui neih tur atan Political party hrang hranga Candidate te chuan ngawrh takin Campaign an kalpui mek.