Candidate ten Campaign beihpui an thlak mek

Mizoram Lok Sabha Inthlanpui neih tur atan Political party hrang hranga Candidate te chuan ngawrh takin Campaign an kalpui mek.

Lok Sabha Inthlanpui neih tura ZPM Candidate Richard Vanlalhmangaiha chuan nimin khan Ngopa tlawhin amah lo hmuaktute hmaah Pathian leh mipuite zara MP atana thlantlin a nih chuan ramin hmasawnna rotling a neih theihna turin theihtawp a chhuah dawn tih a sawi a, “Mizoram sawrkar leh sawrkar laipui inkara indawrnaah leihlawnah ka tang dawn a. Mizoram chhung leh pawn lam tana tangkai thei ang berin hna thawk turin ka rawn pen chhuak dawn a ni,” a ti. Sawrkar tharah kuthnathawktute chawikan nan hma nasa taka lak a ni dawn tih sawiin, tunlai thiamna leh khawl changkang zawk hmangin loneitute tana awlsam leh hlawk zawka thlai thar sawngbawl dante pawh ngaihtuah a ni zel dawn tih a sawi a, chumi atan chuan sawrkar laipui hnuaia kuthnathawktute tana hamthatna awmte tun aia nasa zawka haichhuah an tum dawn tih a sawi bawk.

MNF Candidate K. Vanlalvena chuan nimin khan Lunglei-ah thu sawiin NDA-a an awm zel a tul chhan a sawi a, “Kan Pathian tan, kan ram, kan hnam leh Sakhua vawnghim turin NDA lama lama kan awm ve a tul hle zawk a ni. NDA All Party Meeting-ah vawi tam tak ka tel tawh a, na tak takin thute ka sawi ve a, a chhunga awm kan ni a, tute emaw min sawisel thintute aiin kan hrechiang zawk a ni. Min thlangtling anih chuan kan Sakhua leh Zo hnahthlak hnam hrang hrangte tan theihtawp chhuahin hma ka la zel dawn a, kan ram tana thalo turah chuan engtik hunah pawh NDA zawmna hi ka titawp nghal ang,” a ti bawk.

INC Candidate Lalbiakzama chuan Champhai tlangdung fang mekin kum 2014 atanga India ramah BJP ten Sawrkarna an chan atang khan khawvel mit hmuhah India chu a tlahniam chak hle tih a sawi a. Tunhnaia tehna hrang hrang an siamah pawh a tlahniam chak hle tih sawiin, “Politics-a an khingpuite man khawmin Jail-a an tantirte hian khawvel a barakhaih a. Heng thil avang hian BJP nilo te an tanrual that phah ve thung a. India Bloc a tel lo party te pawh India bloc-ah an rawn tel phah mek a. BJP paih an duhna a lian hle a ni,” a ti bawk.

BJP Candidate Vanlalhmuaka chuan Mizoram Chhimlam-a Autonomous District Council Area fang mekin, “North East-ah hian State President Candidate awmchhun ka ni a, thlantlin ka nih chuan State President tling awmchhun ka ni dawn a, Central Minister nihna chance tha tak ka neih bakah, Kristian pa ka nih bawk avangin Union Minister nihna chanvo hi min pe ngei dawn a ni,” tiin “Kan awmna Party dahthain Mizoram hi India rama mi hriat kan nih theihna turin BJP Candidate ka nih angin khawngaih taka min vote turin ka sawm che u a ni,” a ti bawk.