Tunhnaia chhiatna thlenga In chhia zawng zawng 2938 niin mihring thi pahnih an awm bawk

Tunhnaia Mizoram-a Ruah sur nasa leh hemi kaihhnawiha thli leh rial tla avanga In chhe zawng zawng chu 2938 a tling tawh.
Mizoram sawrkar Disaster Management & Rehabilitation Department thuchhuah chuan Mizoram District 11-a District DEOC leh State Emergency Operation Centre (SEOC) Aizawl atanga Report a nih danin tunhnaia ruahsur nasa leh thli leh rial thawk avanga Mizoram District hrang hranga In chhia hi avaiin 2938 niin, heng zinga In 81 chu luah zui theih loh khawpa chhe vek (Fully damaged) a ni a, In 483 hi nasa taka chhia (severely damage) a ni a, In 2374 te chu a thenlai chhia (Partially damaged) a ni a. Mihring thi pahnih awmin Aizawl-a thing tlu in a delh leh lawngtlai District-a Tek tla in a den mi pakhat ve ve an ni a, hliam tuar mi 5 awmin ran thi pakhat a awm bawk a ni.

Heng In chhia te tanpuina pek theih dan SDRF norms ang chuan Fully Damaged & Severely Damaged te hi Pucca House leh Kutcha House-ah pawh Phai (Plain area)-ah chuan Rs.1,20,000/- zel a ni a, Tlangram (Hilly area)-ah Rs. 1,30,000/- zel a ni thung a. Partially Damaged House (15% chin chhia)-ah erawh chuan Pucca House-ah Rs. 6,500/- zel leh Kutcha House-ah Rs. 4000/- zel a ni thung a. Mitthi-ah hian Ex-gratia cheng nuai 4 pek theih niin Ran thi (vawk) ah hian Rs. 4000/- pek theih a ni bawk.

Disaster Management & Rehabilitation Department thuchhuah chuan thuchhuah an siam hmasak-a In chhia an tarlan ah, Fully damaged leh Severely damaged te chu hlawm khata dah an ni tih sawiin, hei hi tanpuina/assistance pek theih a inan vang a ni tih an tarlang a. Partially damage zat chu In chhia zawng zawng zat anga sawi leh chumi atanga In chhe vek (fully damaged) paiha a chhuak chu Chhe veklo (partially damage) anga ziak an awm avangin In chhe vek leh chhe nasa te chu a hranga dah lehin In chhe nual nen hlawm thum-ah then an nih leh tak thu an sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man