ZPM sawrkar Calcutta High Court lakah a mualpho niin MNF Vice President in a sawi

MNF Vice President leh Assembly House-a Opposition Leader Lalchhandama Ralte chuan ZPM sawrkar chu Calcutta High Court lakah a mualpho nia sawiin, “Kolkata Mizoram House chungchangah mipui bum an tumna laihlan sak a ni,” a ti.

MNF Party in nimin-a Mizo Hnam Run-a Chhung Inkhawm an neih ah MNF Vice President Lalchhandama Ralte chuan Kolkata Ballygunge hmuna Mizoram House hlui hralh-a Mizo mipui ten tangkai zawka an chhawr theih tur, House lian leh dawng hlawk zawk MNF sawrkarin sa tura ruahmanna a lo siam chu ZPM sawrkar tharin thil awmdan kimchang hre ve lo te fuihpawrhnan hman tumin, ram hralhna lehkha lo siam tawh leh a man pawh dawn fel vek tawh chu mumal lo taka cancel-na thupek a ti chhuak niin a sawi a. ZPM sawrkar thupek hi Calcutta High Court chuan Thawhlehni kalta 2.4.2024 khan a hnawl sak thu sawiin, ZPM sawrkarin cancel anih chhan an sawi, 'Mipui nawlpui tana tha zawk tur' tih chu Court hian hnawlsakin, Politics thila hamthatna lak tumna lam hawi zawk a ni, a ti niin a sawi.

Kolkata Ballygunj-a Mizoram House awm thin kha a hlui tawh avangin MNF sawrkar liam ta khan sak that dan tur a ruahman tih MNF Vice President chuan sawiin, “A hmun ngaia sa tha tur hian building regulations hmanlaiin G+3 (Mizo chhiara chhawng 3) baka sak a phal lo a. Kolkata hi Mizo mipuite kawtchhuah pawimawh tak anih tawh avang leh pantu kan pun zel avangin chhawng 3 ringawt chuan a dawng hlawk lo hle dawn a, mipuite mamawhna sang zel a phuhru zo dawn lo a ni,” a ti a. Ballygunj hmun-ah chhawng 3 baka sanga sak phal loh anih lai hian Salt Lake lamah cheng vbc. 18-20 vel te pawhin Mizoram House sak theihna tur khawpa zau ram a la lei theih a, chhawng sang taka sak theih ala nih bawk avangin Ballygunge-a Mizoram House awm thinna hmun hlui chu hralhin, Salt Lake lamah Mizo mipui tam zawkin kan chhawr theih tur, House lian tha leh dawng hlawk zawk sak MNF sawrkar khan a tum tih a sawi bawk.

Lalchhandama Ralte chuan Lengpui Airport pawh AAI kuta hlan turin MNF sawrkar hunlai khan tum tam tak inbiakna a lo awm tawh thu sawiin, “Mizoram tana hamthatna awm chhunzawm ve tur, mipuite pawm theih tur inremna MNF sawrkar khan a phut tlat a, chu chu AAI lamin an la rawn chhawpchhuah theih loh avangin Mizoramin infrastructure a neih hlu tak AAI kuta pawngpaw pek ringawt kha MNF sawrkar khan a remti lo a ni zawk,” a ti a. “Chutiang bawkin, Mizoram in Medical College a neih hmasak ber leh a neihchhun ZMC pawh Mizo zirlaite tana lungawithlak tawk seat hauhsak chung sia Central sawrkar enkawlna hnuaia dah dan tur ngaihtuahtu Consultative Committee dinin, thui tak MNF sawrkar khan a lo zirchiang tawh,” a ti bawk.