Lenkawl

Serchhip District-a Excise & Narcotics Department a thawktu mi pahnih te chu kumin a India Republic Day lawmna neih turah Governor's Medal dawng tura thlan an ni.

Serchhip District Bawrhsap David Lalthantluanga chuan Serchhip District chhunga NH-54 laihzauh leh siamthat hna thawh mekah khawng taka hmalak zui a ni dawn tih sawin, zangnadawmna la tawh zingah chawlhkar hnih khat chhunga mahni In leh thiat lo te chu thiah sak an nih dawn bakah thubuai siam sak an nih dawn thu a sawi.

Serchhip District chhunga mitthi leh naupiang te chhinchhiah hna thawktu, Registrar of Births & Deaths (RBD) te tan ni khat awh Training chu nimin khan Serchhip DRO Conference Hall-ah neih a ni a, Myanmar atanga rawn raltlan zinga nau nei te chu Birth Certificate pek loh tur a nih thu tarlan a ni.

Serchhip P&E Veng-a cheng Lalhluna (63) chu nimin tlai khan a kawmthlang ah a ruang hmuh niin Vawiin hian vuiliam a ni ang. Thudawn danin Lalhluna hi mahni a khawsa niin nimin tlai dar 4:00 vel khan a kawmthlang ah a ruang hi hmuh niin a tukverhah chesualin a tla nia rin a ni a, a thih hun tak hi hriat a ni lo. A ruang hi New Serchhip North-a a pa, Laichhinga hnenah lak a ni.

Chhiahtlang South Village Council chuan Executive Body an siam thar nia thudawn a ni a, tuna VC term kal mekah VC President mi pathum an awmna tur niin VC Executive Body tum 4 an siamthatna tur a ni ang.

Nimin khan Thenzawl Higher Secondary School ah ramngaw leh bio-diversity humhalh a pawi-mawh zia inzirtirna neih a ni.

Nimin khan Serchhip RD Block huamchhung ah MGNREGA hnathawh dan Mobile Phone hmanga hmuha hriat theihna tur JANMANREGA beihpui thlakna chu hlawm thumin neih a ni a, he hunah hian RD Department-a thawktute chu hmun hrang hrangah chhuakin Mobile Phone-a he apps neih theih dan leh a hman dan zirtirin mi 200 vel zet te chu he apps hmang tur hian ziahluh a ni.

National Institute of Technology (NIT) Mizoram a Asst. Registrar hna lakah mimal induhsakna uchuak tak a awm nia sawiin, MZP chuan nimin a NIT Mizoram Convocation neih tur chu an dodal a, nimin tlai khan inbiakna an neih hnuah NIT Board of Governor Chairman in MZP lungawih lohna lantir chhan chu chhui a tiam avangin lungawi lohna lantir chu tihtawp a ni.

Myanmar ramchhunga Myanmar Sipaite leh mipui Sipai te inbeihna kal zelah nimin khan Myanmar ramchhunga Karma lui-ah inkap lehin Myanmar Sipai mi 278 zet chu nimin tlai dar 4:00 vel khan Mizoram chhungah an rawn tlanlut leh a, heng Myanmar Sipai te hi India ram lama ramri vengtu Assam Rifles ten an buaipui mek a, midang rawn luh belh tur pawh an la awm mai thei nia thudawn a ni. Myanmar ram buaina avanga inkahna thlengah hian nikum atang khan Myanmar Sipai te hi India ramah tum engemaw zat an rawn lut tawh a, heng te hi sawrkar chuan lo dawngsawng in Helicopter hmangin hmun him lamah thiar an ni thin a ni.

International Fund for Agriculture Development (IFAD)-a Country Programme Analyst Piyush Kana chu nimin khan Chief Minister Lalduhoma chuan a Pisa-ah kawmin IFAD kaltlanga an hmalakna te a lo hmuh tawh thu a hrilh a, Covid hripui avanga an beisei anga hna an thawh theih loh dan te, inthlanpui avanga an sum leh pai che vel a muan thute a hriatpui tih sawiin, hei vang hian an hmalakna te chu a hun chhung pawhsei a tul a tih thu a hrilh a. Tuna FOCUS hmalakna hian District paruk chauh a huam avangin District zawng zawng huapa hmalak zui zel tha a tih thu pawh a sawi a ni. Chief Minister hian loneitute hmasawn zelna an ngaihpawimawh thute, thlai thar thlanbik leina tur an ruahman thute hrilhin, heng thlai bika kan tharchhuah te pawh kum khat hnuah chuan nasa taka a pun chhoh a rin thu a lo hrilh a ni.