NH. 54 siam mekah zangnadawmna la tawh, In la thiat lo te chungah khawng takin hmalak zui a ni dawn

Serchhip District Bawrhsap David Lalthantluanga chuan Serchhip District chhunga NH-54 laihzauh leh siamthat hna thawh mekah khawng taka hmalak zui a ni dawn tih sawin, zangnadawmna la tawh zingah chawlhkar hnih khat chhunga mahni In leh thiat lo te chu thiah sak an nih dawn bakah thubuai siam sak an nih dawn thu a sawi.

Serchhip District chhunga National Highway-54 laihzauh leh siamthat hna thawh mek chungchang ah nimin khan Serchhip District Bawrhsap leh Competent Authority for Land Acquisition (CALA) David Lalthantluanga hovin Serchhip District thuneitute, kawngpui enkawltu NHIDCL leh an hnuaia Contractor aiawh te bakah he kawngpui in a paltlang Serchhip District chhunga Village Council hrang hrang aiawhte chu Serchhip DC Meeting Room-ah thukhawmin he kawngpui laih hna thawh mek dinhmun leh harsatna awm te an thlirho a. He hunah hian Bawrhsap chuan he kawngpui laih mek hi kumin March thla ah zawhfel tum a nih thu sawiin, kawng tha kan neih theihna turin hun rei tak harsatna kan tuar a, vaivut khu tuarin mipuite nunphung pawh khaihlakin hmasawnna atana pawimawh kawngpui siamthat hna hi a hmawr bawk tep a nih thu leh hna erawh ala tam thu a sawi a. Hetih mek lai hian he hna thawh mekah hian zangnadawmna la tawh zingah mahni In la thiat duh lo mi tlemte an la awm thu sawiin, heng mite chungah hian khawng taka hmalak a nih dawn thu Bawrhsap chuan sawiin, chawlhkar hnih khat hnuah an la thiat lo a nih chuan nawr chhiat sak an nih dawn thu leh IPC Sec. 188 hmangin thubuai siam sak zel an ni dawn tih lo hrilh turin he huna tel VC aiawhte chu a chah a ni.


Bawrhsap chuan he hna thawh mekah hian zangnadawmna la tawh te chu kum 2019 khan ni 60 chhunga insenghawi tura hriattir an lo nih tawh thu sawiin, nikum August thla khan ni 10 chhunga insenghawi tura hriattir leh an ni tih a sawi a. Heti chunga In thiat duh lo mi pakhat chu a In thiah sak a nih tawh thu sawiin, tunah hian In la thiat lo te chu thiat tura an tih leh thu a sawi a. “Mi tlemte avangin khawtlang leh mipui kan buai a, kan nunphung pawh a khaihlak a ni,” tiin In la thiat lo thenkhat te chuan Court-ah kalin Ukil an rawih mek thu an sawi thu Bawrhsap chuan a sawi bawk a. “Court in Stay Order a chhuah loh chuan kan thiat tho ang,” tiin Court in Stay Order a chhuah loh chuan thiah loh chhan ah thu tling a awm loh thu leh Court pawhin Stay Order chhuah ngai lo ah a ngai zawk nia ngaih a nih thu a sawi a. Zangnadawmna la lo te, assessment tih lai a hmaih palh te leh building chhawng assess kim loh te an awm chuan thuneitute nen a hmunah ngei tlawhin enfiah an ni dawn tih a sawi bawk.

Nimin-a thutkhawm ah hian zangna-dawmna la tawh zingah mahni In la thiat lo te chungchang chu a mal te te a thlirho niin heng In neitu ten In an la thiah loh chhan leh harsatna an tawh nia tarlan te thlirho a ni a, lungawilohna ziaka thlen te pawh an chungchang hi ngaihtuah niin he thutkhawm ah hian ko lutin an dinhmun te hrilhfiah an ni bawk a. thenkhat chu a hmunah enfiah tura tih a ni bawk.

National Highway-54 kawngpui laih mek ah hian Serchhip District huamchhunga compensation dawng tawh zingah a tam zawk chuan an In te an thiat fel tawh a. Mi tlem te chauh thiat lo an la awm a. Heng khaw hrang hrang a Village Council te, khawtlang hruaitute leh khawtlang mipuiin kawng tha a awm theihna tura sawrkar hmalakna an thlawp tlat avangin District Administration chuan lawmthu an sawi a ni.

Tarlan tawh angin Serchhip District chhunga zangnadawmna la tawh zingah hian Khumtung, Baktawng, Buhkangkawn leh Serchhip khua a mi te chuan an In te hi an thiat tawh hlawm a, a bak khaw dang pali-ah chuan In la thiat lo hi tlem la awmin nikum khan Chhing-chhip khuaa In pakhat chu khawl hmangin thiah sak an lo ni tawh a. Tunah hian sawrkar chuan chak takin hma a la mek zel a ni.

Comments

Popular News (Last 30 Days)

Vawiin-ah HSSLC Exam result