Myanmar atanga raltlan rawn lut zinga fa nei te Birth Certificate pek loh tur a nih thu tarlang

Serchhip District chhunga mitthi leh naupiang te chhinchhiah hna thawktu, Registrar of Births & Deaths (RBD) te tan ni khat awh Training chu nimin khan Serchhip DRO Conference Hall-ah neih a ni a, Myanmar atanga rawn raltlan zinga nau nei te chu Birth Certificate pek loh tur a nih thu tarlan a ni.

Directorate of Economic & Statistic leh District Research Officer (DRO) Office, Serchhip tangkawp buatsaih he training hi Serchhip DRO Lalthangmawia chuan kaihruaiin kumtin hetiang hian RBD te tan Training buatsaih thin a nih thu sawiin, an hnathawhna kawnga hriat tur in hriattir tharna hun a nih bakah kum kalta lama an Report te an thehluhna hun a nih avangin ngaih pawimawh tur a nih thu a sawi a. RBD ten ni tin-a an Bial chhunga mitthi leh nausen piang thar an report thin chu ngaih pawimawh tur a nih thu pawh sawiin, hei hi RBD ten an ngaih pawimawh thin avangin sawrkar laipui lamah pawh Mizoram chu a hmingthat thu a sawi a. Tunah hian Online hmanga Registration kalpui tura ruahmanna a awm mek thu pawh a sawi bawk.

Serchhip DRO leh Addl. District Registrar Lalthangmawia chuan tunhnaia Myanmar tualchhung buaina avanga Mizoram-a rawn raltlan zingah nau nei an awm thu sawiin, heng nausen piang te hi RBD te chuan ziahluh loh tur a nih thu leh Birth Certificate pawh pek loh tur a nih thu a sawi a. Manipur atanga raltlan rawn lut te erawh India khua leh tui an nih a, nausen piang nu leh pa ten Voters ID an nei a nih chuan ziahluh tur leh Certificate pawh pek tur a nih thu a sawi a. Kum 10 dan-a India ram Chhiarpui neih thin chu neih hun tur kum 2021-ah khan hri leng avanga neih theih a nih loh thu sawiin, tuna RBD ten Report an pek hmangin tih thar zel a nih thu leh Report an pek chu Chhiarpui a ni tih hriaa thahnem an ngaih a pawimawh thu a sawi bawk.

Nimin-a Training buatsaih ah hian Serchhip DRO Office-a DPA K. Zodinpuia chuan Serchhip District-a RBD te chuan tha taka an hna an thawh thin thu sawiin, hei vang hian Annual Training an buatsaih pawh a hautak loh thu a sawi a. RBD te hnathawh tur hrang hrang leh Form an pekchhuah dan tlangpui te tarlangin, nausen a pian atanga ni 21 leh mi an boral atanga ni 21 thlengin Certificate te a thlawna pekchhuah tur a nih thu a sawi a, hemi hnu lamah chuan man chawi-a pekchhuah a tul tawh thu sawiin, mipuite pawhin man chawi ngai lo hun chhunga lakchhuah nachang an hriat a tul thu leh RBD te pawhin mipuite an finchhuah a tul thu a sawi a. Digital Birth Certificate chungchang leh a hman dan te pawh he hunah hian zirho a ni bawk.

Serchhip District-ah hian Registrar of Births & Deaths (RBD) hi Unit 50 awmin heng zinga 42 te chu khua leh Veng hrang hranga awm niin a dang 8 chu Institution (Hospital) a awm a ni a, tunah hian Serchhip khawpui chhungah Unit pakhat siam leh tum mek a ni bawk.