Lenkawl

Kumin September thla a ‘Swachhta Hi Seva’ chhunga Serchhip khawpui chhunga Village Council Area Fai thlanchhuah te hnenah Serchhip District Bawrhsap David Lalthantluanga chuan nimin khan lawmman a hlan a, Serchhip-a VC Area 14 zingah Serchhip Vengchung VC in lawmman pakhatna an dawng a ni.

Nimin khan Aizawl-a Secretariat Conference Hall-ah State TB Forum thutkhawm neiin kumin chhungin Mizoram-ah TB vei mi 1929 hmuh an nih tawh thu leh January atanga June thla thleng khan TB vanga thi mi 62 an awm thu tarlan a ni a. TB vei hmuh thar zinga 122 chu tihdam harsa chi MDR-TB vei an ni a. MDR-TB hmuh zinga zaa 70 chu enkawl dam niin, TB vei zawng zawng zinga 83 tihdam an ni thung. Pradhan Mantri TB Mukt Bharat Abhiyaan hnuaia TB damlote chhawm-dawlna kawngah tanpuina petu mi 274 awm tawhin chawtha 2,373 sem a ni tawh tih tarlan a ni bawk.

Aizawl District Marketing Cooperative Society Ltd. Special Assembly hmasa ber leh All India Cooperative Week vawi 70-na lawmna chu nimin khan Aizawl Press Club-ah neih a ni a, he hun hi Apex Bank Chairman Lalnunsanga chuan khuallian nia hmanpuiin tunhnaiah India sawrkarin Primary Agricultural Credit Societies (PACS) te hmangin mirethei leh kuthna-thawktute chawikan a tum tih a sawi a, PACS chu thingtlang lamah din chhoh zel tum a nih thu leh ruahmanna te a nihna anga kalpui a pawimawh thu te a sawi bawk.

Tunkar Thawhtanni zing-a boral Rev. Violet Louise Anne Mark, Pi Vaili tia hriat chu nimin khan vuiliam a ni ta.

Kum 2023-2025 chhunga Central YMA hruaitu thlanna neih a nih hnua YMA rorelna sang ber dawttu, Central Co-Ordinnation Committee (CCC) thutkhawm hmasa ber chu nimin khan Vaivakawn YMA Hall-ah neih a ni a. CCC thutkhawm vawi 98-na hi Central YMA President Lalhmachhuana chuan kaihruaiin General Secretary Prof. Malsawmliana chuan CCC Meeting neih hnuhnung ber September ni 13, 2023 leh tun tum thutkhawm inkara Central YMA chetvelna leh hmalakna hrang hrangte, rorêl thu bawhzui kawnga hmalaknate leh YMA Inkhawmpui Lian, 2023 Biate-a neih report-te a pe a. October ni 24 atanga ni 26, 2023 chhunga Biate-a YMA Inkhawmpui Lian thlirletna hun hmang bawkin, Khawmpui lian-a Rorêl palaite thurel bawhzui dan tur an rel a, hmalakna tak tak chu Central Executive Committee (CEC) kutah dah a ni.

Mizoram Sawrkar hnuai Environment, Forest and Climate Change Department bultumin, Nature Learning Centre, Mizoram-a thawktute, MZP Hqrs.Champhai hruaitu mi 6 leh Champhai Vengsang H/S zirlai 4 te chuan nimin khan Assam-a Kaziranga National Park an tlawh.

Mizoram Governor Dr. Hari Babu Kambhampati chuan nimin khan Ek Bharat Shreshta Bharat hmalakna hnuaiah Jharkhand State leh Uttarakhand State Formation Day lawmna hun a buatsaih.

Sawrkar Laipui Ministry of Tourism hnuaia Swadesh Darshan 2.0 Scheme kaltlanga Champhai District-a Tourism kawnga hmalak dan tur chu nimin khan Champhai DC James Lalrinchhana hovin Champhai DC Conference Hall-ah neih a ni a, Swadesh Darshan 2.0 Scheme kaltlang hian Mizoram-ah Aizawl leh Champhai te tourism kawnga hmalakna atan thlanchhuah niin, he project kalpui chhungah hian Champhai District-ah cheng nuai 9000 kaltlanga hmalak tum a ni a. Tun dinhmunah Tlangsam, Zotlang, Keilungliah, Vangchhia, Farkawn leh Dungtlang ah te hmalak tum a ni a. Swadesh Darshan thiltumte leh kalpui dan tur te a sawifiah a ni bawk.

National Highway-54 laihzauh leh siamthat hna thawh meka Lunglei leh Hnahthial District tana Competent Authority for Land Acquisition (CALA) leh Lunglei DC Ramdinliani chuan zangnadawmna pekchhuah tur chu pekchhuah fel vek a nih tawh thu a sawi.

Champhai District Special Court ND&PS Act Liansangzuala chuan Dan phal loh Heroin tawlhru-a puh Lalbeiseia (78) leh Lalnuntluanga (40) te chu thiamloh chantirin kum 10 lung In tang tur leh cheng nuai khat chawi turin a hrem. Lalbeiseia leh Lalnuntluanga te hi pafa niin Champhai Vengsang a khawsa an ni a, July ni 13, 2022 tlai dar 3:00 khan Dawrkai-kawn-ah Champhai Police-in an Car atangin Heroin hawng 22 an man sak a, Champhai District Jail-ah dahluh an nih hnuah bail a chhuah lailawk tir an ni a, bail-a an chhuah chhung hian Lalnuntluanga zawk hi damdawi kaihhnawih ah man nawn leh a ni. An thubuai hi Court chuan a ngaihtuah hnuah Special Court ND&PS Act chuan kum 10 chhung lung In tang tur leh cheng nuai khat ve ve chawi turin a hrem a, pawisa chawi tur hi an nei lo a nih chuan thla 6 dang an tan belh leh dawn a ni.