Lunglei/Hnahthial-ah zangnadawmna pe fel tawh

National Highway-54 laihzauh leh siamthat hna thawh meka Lunglei leh Hnahthial District tana Competent Authority for Land Acquisition (CALA) leh Lunglei DC Ramdinliani chuan zangnadawmna pekchhuah tur chu pekchhuah fel vek a nih tawh thu a sawi.

Lunglei leh Hnahthial District-a CALA hian thuchhuah siamin Ministry of Road Transport & Highways, Govt. of India hnuaia National Highway-54 zauh hna, 'Widening and up-gradation to 2 lane with paved shoulder and geometric improvements from Km 008.000 to Km 380.000 on Aizawl - Tuipang section of NH-54 in the State of Mizoram' Project kalpui mek atana ram leh assets lak sak zawng zawngte chu compensation leh solatium 100% pek fel vek a ni tawh tih a tarlang a. Compensation dilna thehluh thar tlem azawng te pawh enfiah niin a tul anga hmalak mek a nih thu a sawi bawk.

Lunglei DC chuan chak taka kawng zauh hna hi thawh anih theih nan compensation dawng tawh zawng zawngte hi an ram, Sawrkarin a lak tawh chu chhuahsan tura hriattir an lo ni tawh thin thu leh mi tam takin he hriattirna hi tha taka zawmin sawrkar ram lak tawh te chu an lo chhuahsanin an In leh lo leh bungrua te pawh an lo senghawi tawh tih a sawi a. Hetihlai hian mi thenkhat, Sawrkar ram lak tawh chhuahsan duh lo an awm avangin tun thleng hian kawng laih hna ti thuanawp an la awm fo tih hriat a ni tih tarlangin, Chuvangin, The National Highways Act, 1956, Section 3E(1) in thuneihna a pek angin compensation la fel tawh, ram la chhuahsan lo zawng zawngte chu chhuahsan turin tun thla ni 14 khan a hriattir a. “He hriattirna chhuah ni atanga ni 15 (sawmpanga) ralhma ngeiin Sawrkarin ram a lak fel tawh atanga inthiar chhuaka, National Highway-54 laih hna dipdal tawh lo tura hriattir an ni,” a ti a. He huntiam chhunga chhuahsan lo chu The National Highways Act 1956, Section 3E(2)(b)-in District Collector hnena thuneihna a pek angin District Collector, Lunglei/Hnahthial chuan hma a lak tur thu a tarlang bawk.