VC Area Fai thlanchhuah te hnenah lawmman hlanin pakhatna Serchhip Vengchung VC

Kumin September thla a ‘Swachhta Hi Seva’ chhunga Serchhip khawpui chhunga Village Council Area Fai thlanchhuah te hnenah Serchhip District Bawrhsap David Lalthantluanga chuan nimin khan lawmman a hlan a, Serchhip-a VC Area 14 zingah Serchhip Vengchung VC in lawmman pakhatna an dawng a ni.

Serchhip District Bawrhsap Pisa-a VC Area Fai thlanchhuah te hnena lawmman hlanna hunah hian Bawrhsap David Lalthantluanga chuan kumin September 15 atanga October 2 chhung khan rampum ah Swachhta Hi Seva hi hman a nih thu leh hemi chhung hian mipui leh sawrkar in Faina kawngah nasa taka hma an lak thu a sawi a. Faina Hapta hman a ni thin leh Faina kawnga inelna buatsaih a ni chu tha a tih thu sawiin, amaherawh chu heng te inzirtirna hun bik ah hmangin Faina chu kumtluan-a kan kalpui tur leh kan nunpui tur a ni tih kan hriat a tul thu a sawi a. Mizoram chu State dang ngaihtuahin kan fai viau tih pawh sawiin, chutihrual chuan hmabak erawh kan la ngah hle tih hria a tan la thar turin he huna kalkhawm te a chah a. Serchhip chu khawpui fai tak, bawlhhlawh hmuh tur pawh awm mang lo khawpa fai a nih thu sawiin, khawtlang hruaitu VC te leh tlawmngai pawl te, mipui mimir te fakawm a tih thu a sawi a. “Tifaitu ah kan tang thei lo a nih pawhin tibawlhhlawhtu ah tumah hi tang lo ila, kan khawtlang leh kan In leh a vel te a lo faiin a lo thianghlim leh zual thei ang,” tiin faina kawnga hma la zui zel turin a chah a ni.

Nimin-a Village Council Area Fai thlanchhuah te hnena lawmman hlanna hun hi Serchhip District Urban Development Officer (DUDO) Gaston Vanlalhriatpuia chuan kaihruaiin kumin-a Swachhta Hi Seva hman chhung hian Veng tinah Village Council ten Faina kawnga an theih anga hma an lak thu leh October ni 2 atanga ni 8 chhunga Faina Hapta hman chhungin heng VC Area Fai te hi MJA te chuan an enfiah thu a sawi a. Inthlanpui neih a nih tak avangin result puanna leh lawmman hlanna neih nghal mai theih a nih tak loh thu a sawi bawk.

Tun tuma Village Council Area Fai thlanna ah hian Serchhip Town chhunga VC 14 te zingah Serchhip Vengchung VC chuan lawmman pakhatna dawngin Rs. 20,000/- leh thuziak an dawng a, pahnihna Serchhip Chanmari VC in Rs. 10,000/- leh thuziak dawngin pathumna Serchhip P&E Veng VC leh Serchhip Hmar Veng VC ten Rs. 5000/- leh thuziak an dawng ve ve bawk a ni.

Kumin-a rampum-a Swachhta Hi Seva hman ah hian thupui atan ‘Garbage free India - bawlhhlawh awm lohna India’ tih chu hman niin hemi hun chhung hian Serchhip-ah pawh UD&PA Department hmalakna in faina beihpui thlak a ni a. Sesah kawr tihfai hna chu Govt. Serchhip College NSS ten thawkin DAY-NULM hnuaia Self-Help Group (SHG) ten Serchhip khawpui chhunga vantlang inthiarna zawng zawng an tifai a; Brilliant Higher Secondary School leh Presbyterian English School, New Serchhip-ah te hman khat daih plastic hmang lo tur leh bawhhlawh thliar tura inzirtirna kalpui a ni a; Swachhata hi Seva pual hian VC Area hrang hrangah Faina hnatlang neih a ni bawk a ni.

Nimin-a VC Area fai lawmman semna hun hi Serchhip Addl. DC Lalnundika leh DIPRO Lalnunmawii te pawhin telpuiin tual-chhunga thuthar thehdarhtu thenkhat te pawhin an telpui bawk a ni.