Pi Vaili thlahna leh vuina hmang

Tunkar Thawhtanni zing-a boral Rev. Violet Louise Anne Mark, Pi Vaili tia hriat chu nimin khan vuiliam a ni ta.

Pi Vaili thlahna leh vuina hi Saikao Mission Compound tual-ah nimin khan chhawng hniha buatsaih a ni a, a thlahna inkhawm chawhma dar 10:30-ah tanin Congregational Church of India Maraland Executive Secretary, Rev. Z. Hrohmo chuan a kaihruai a, Kohhran bakah pawl hrang hrangin amah thlah nan a kuang chungah pangpar an dah a, hmun hrang hrang atanga thalai rual kal khawmin ‘Halleluiah chorus’ an rem a ni.

Thlahna hun hmasa hman zawh a nih hnu hian chhun dar 12:30-ah vuina programme hman chhunzawm a ni a, Evangelical Church of Maraland Moderator, Rev. K. Laichhua Azyu chuan kai-hruaiin ECM Assembly Moderator, Rev. Phosa Chozah in vuina hun a hmang a. ECM Sr. Executive Secretary, Rev. Salaw; Congregational Church of India Maraland General Secretary, Rev. Beirakaw; Rev. A Rakhai; Mara Autonomous District Council CEM, M. Laikaw leh Pi Vaili pasal Rev. L. Mark ten thu an a sawi bawk.