Raj Bhavan-ah Jharkhand leh Uttarakhand State Formation Day pualin hun hman a ni

Mizoram Governor Dr. Hari Babu Kambhampati chuan nimin khan Ek Bharat Shreshta Bharat hmalakna hnuaiah Jharkhand State leh Uttarakhand State Formation Day lawmna hun a buatsaih.

Raj Bhavan Durbar Hall-a he hun buatsaih ah hian Governor Dr. Hari Babu Kambhampati chuan he ni pawimawh takah hian State pahnih mipuite chu chibai bukin lawmpuina a hlan hmasa a. State pahnih a lo pian theihna atana theihtawp chhuahtute, hruaitu pawimawh tak tak te leh khua leh tui mi tangkai tak te zahna chibai a buk bawk a. Ministry of Home Affairs in State hrang hrang te formation Day inhmanpuina tur program, Ek Bharat Sheshta Bharat hmalakna hnuaiah a siam chu tha a tih thu sawiin, ram inpumkhatna atan leh State danga chengte nena in hmelhriatna tha tak a ni, a ti bawk. 

He hunah hian Tribal hruaitu huaisen leh ropui, zalenna sualtu ni bawk Birsa Munda leh Tribal mite zinga zalenna sualtute zahna chibai bukin a chanchin tawi a sawi a. Birsa Munda huaisen leh zalenna atana a thawh hlawk zia te leh Tribal Freedom Dighter te chawimawina atan Birsa Munda piancham chu India sawrkarin Janjatiya Gaurav Divas atan kumtin hman tura a puan thu te a sawi tel bawk.

Nimin-a he hun hmanna ah hian Governor-in Birsa Munda thlalak hmaah zahna lantirin pangpar a dah hnuah program hi tan a ni a. Hemi hnu hian Uttarakhand Governor leh Jharkhand Governor te thuchah ngaihthlak a ni a. State pahnih te hlimthla video clip kaltlangin thlir chhunzawm leh a ni a. Hemi hnu hian Prof Bijay Singh, VC ICFAI Mizoram leh State pahnih aiawh te hnen atangin thusawi ngaihthlak a ni bawk.

Uttarakhand State hi November 9, 2000 khan Uttar Pradesh Reorganization Act, 2000 hmangin Uttaranchal tia din a ni a, Uttar Pradesh State atanga then niin January 1, 2007 khan Uttaranchal chu Uttarakhand tia thlak leh a ni a, State a nih hmaa helai hmun sawina hminga a pu ta a ni. Jharkhand State hi November 15, 2000 khan Bihar State chhim lam chanve vel sahthlak atanga siam a ni a. He mi ni hi Jharkhand tan chuan Tribal hruaitu lar tak leh zalenna sualtu Birsa Munda pian champha phak a ni nghal bawk a ni.