Nimin atang khan rampumah ‘Fire Service Week’ chu hman tan leh niin Serchhip-ah pawh he Hapta hman pual hian Fire & Emergency Services chuan kangthelhna a chesual nunna chan te sunna hun hman a ni.
Serchhip-a MIZOFED LPG-a thawktute chuan mipuite hnena LPG Home Delivery kal-pui mek chu a hlawhtling nia an hriat thu sawiin, amaherawh chu Veng danga kalpui zel theih a nih dawn leh dawn loh an hriat loh thu an sawi.
MNF President Zoramthanga chuan nimin khan MNF Serchhip East leh West Block Joint Block Conference chu Serchhip-ah hmanpuiin LMC inthlana an tla fai vek chu hrehawm an tih thu leh an zak em em tih a sawi a, “Kan lo lungmuan deuha Lunglei a kan tlakna hi inkaihharh nan kan hmang dawn,” a ti.
Serchhip-a Excise & Narcotics Department chuan nizan hmasa khan Serchhip Lower Chanmari Veng-ah Ganja gram 416.2-a rit an man a, a neitu nia hriat Lalhmunmawii (42), Lower Chanmari nia insawi pawh manin thubuai siam sak a ni bawk.
MIZOFED Serchhip Branch-a Manager hna chelh mektu FC Malsawmtluanga chu Ai-zawl-a Head Office-a awm turin tunhnai khan sawn a ni a, a aiawh tur hian Siaha atangin Vanlalsawma Vuangtu chu rawn awm tura tih a ni.
Mizoram-ah COVID-19 hri kai enkawllai mi 5 an awm leh ta a, kumin March 31-a COVID-19 hri kai hmuhchhuah chu a dinhmun ala that loh avanga damdawi In-a enkawl mek a nih bakah tunkar Nilaini khan hri kai mi pahnih hmuh niin Ningani khan hri kai mi pahnih bawk hmuh leh an ni a, heng mi 5 te hi enkawl mek niin an vai hian Aizawl District-a hri kai hmuhchhuah te vek an ni.
MNF Party chuan nimin khan thuchhuah siamin April 13, 2023 zan-a ZONET chanchin thar-a NGO pakhat Association for Democratic Reforms (ADR) ten India rama State Chief Minister hrang hrangte sum lakluh leh thubuai an neih theih dan a zirchianna ah, Mizoram Chief Minister Zoramthanga chu serious criminal case nei anga an tarlan chu ADR zirchianna hi thu belhchian dawl lo a ni tih an tarlang.