LPG Home delivery kalpui zel dan tur hre rih lo

Serchhip-a MIZOFED LPG-a thawktute chuan mipuite hnena LPG Home Delivery kal-pui mek chu a hlawhtling nia an hriat thu sawiin, amaherawh chu Veng danga kalpui zel theih a nih dawn leh dawn loh an hriat loh thu an sawi.

Serchhip-a LPG Home Delivery kalpui mek chungchanga LENKAWL zawhna chhangin MI-ZOFED-a thawktute chuan Serchhip-a Veng 6-ah LPG Home Delivery hi kalpui mek a nih thu leh heng te hi P&E Veng, Chanmari Veng, Hmar Veng, Vengchung, New Serchhip Venglai leh New Serchhip Bazar Veng te a nih thu an sawi a. Sawrkar ruahman angin heng Veng hrang hrang bakah hian kalpui zel tura an in ruahman laiin zirchianna te neih leh phawt tura ruahman a nih tak avangin Veng dang-a kalpui zel dan tur an hriat rih loh thu an sawi a ni.

MIZOFED-a thawktute chuan Veng hrang hranga LPG Home Delivery an kalpui chinah harsatna an tawk lo tih sawiin, mipuite atang pawhin harsatna thu dawn an nei lo tih an sawi a. Amaherawh chu Veng hrang hranga mipuite hnena LPG petu zingah semchhuak har deuh an awm thin avanga Gas bur leh pawisa lut a muan deuh avangin Gas rawn thleng leh erawh a tlai phah lek lek thin nia an hriat thu sawiin, eirawngbawlna Gas bur leh pawisa te hi inbanlek ve reng a ni tih an sawi a. Veng thenkhat erawh chuan an rawn tih that thu an sawi bawk a ni.

LPG Home Delivery chu Serchhip bik ah chuan MIZOFED tan pawh a that zawk thu thawktute chuan an sawi a, Aizawl Municipal area-ah erawh chuan Agency ten consumer an neih darhsarh avangin harsatna an tawk thei nia an rin thu leh khawpui dangah erawh chuan thil harsa leh hautak nia a lan loh thu an sawi bawk.