Kan lo lungmuan deuha Lunglei a kan tlakna hi inkaihharh nan kan hmang dawn - MNF President

MNF President Zoramthanga chuan nimin khan MNF Serchhip East leh West Block Joint Block Conference chu Serchhip-ah hmanpuiin LMC inthlana an tla fai vek chu hrehawm an tih thu leh an zak em em tih a sawi a, “Kan lo lungmuan deuha Lunglei a kan tlakna hi inkaihharh nan kan hmang dawn,” a ti.

Serchhip Auditorium-a MNF Serchhip East leh West Block Joint Block Conference-ah hian MNF President Zoramthanga chuan LMC inthlanah an tla fai vek tih sawiin, “Hreawm kan ti a, kan zak em em a ni,” a ti a. “Nimahsela, Joshua ho anga Israel fate nen an diklohna lai an inenfiah ang khan theihtawpin kan bei leh dawn a. MNF hotu pawimawh zawng zawmg kan thukhawm tawh a, chuta kan thu chu, 'Tho rawh, enge kan tihdik lohna lai, enge kan chaklohna, kan khingpuiten min beihna zawng zawng hi engnge ni?' kan ti a. Kan lo lungmuan deuha Lunglei a kan tlakna hi inkaihharhnan kan hmang dawn,” a ti a ni.

MNF President chuan, “Tho rawh u, kan dingchhuak leh dawn,” ti-a rawn au turin a lo kal tih sawiin, “Eptuten Social Media-ah kan sawrkar hi a chhe thei ang bera min beiin, Zoram chhe lailet der angin an chhuah a, mipui leh thalaite sawrkar laka beidawng ngawih ngawih turin an fah a. Chuvangin, beihpuiin kan bei ve tawh dawn a ni,” a ti a. “Opposition ten min sawiselna SEDP leh SASCI-te hi Pathian in malsawmna min pek a ni a. MNF hian harsatna tam tak kan hmachhawn tawh, nimahsela Pathian in min hruaichhuak leh zel a ni tih hi i pawm ngam ang u,” a ti a. “Kan Hnam movement engmahlo a chhuah tumtute an hniam sat sat zel a, thalaite pawhin hmana in phal loh kha a ni, kan Pathian pawhin a phal bawk lo. Chuvangin kan Hnam Movement Champion-na hi kan thalaite hnenah Pathian thlarauin a dah a, Vawiin thlengin a alh zel a ni. Party-in advangtage lak duh vanga sawi nep tumtu te hi thalai ten kan phal tur a ni lo,” a ti bawk.

Nimin-a Joint Block Conference hi Serchhip East Block President H. Lalthianghlima chuan kaihruaiin an Party zawm thar Voters 146 lawmluh an ni a, he hunah hian MNF Adviser, J. Malsawmzuala Vanchhawng pawhin Party Worker ten thawhhohna tha an neih zarah Serchhip bial-ah hnehna an chan ngei a beisei thu a sawi a. “Kan sawrkar hian nasa takin Serchhip bial-ah hmasawnna hna a thawk a, nuai za tam tak sengin College Administrative Building turte min sak sakin, Bazar hmun turin PWD department-te min sawnchhuah sak turin hma a la a. Nasa taka hma min laksakna ah sawrkar chungah lawmthu kan sawi a ni,” a ti bawk.