Serchhip-ah ‘Fire Service Week’ pualin kangthelhna a nunna chan te sunna hun hmang
Tun thla ni 20 thleng awh tur Fire Service Week-ah hian ‘Kangmei laka fimkhur nachang hriat hi ram hmasawn zelna atan a pawimawh’ tih chu Thupui atan hman niin he Hapta hman tan ni, April 14 hi Martyrs Day atan hman thin a ni a, Serchhip Fire Station a thawktute pawhin nimin khan Station Incharge LFM Ruatliana hovin Martyrs Day hi hmangin nikum 2022 chhunga India rama kangthelhnaa thi mi pathum te hming chhiar chhuakin anmahni sun nan Minute khat ngawi renga dingin hun an hmang a. Kumin-a an sun te hi Sh. Praveen Kumar (Fire Operator, Delhi Fire Service); Sh. Vasudev Sadashiv Haldankar (Leading Firefighter, Goa Fire & Emergency Services) leh Sh. Nitin Singh (Fireman, Uttarakhand Fire & Emergency Services) te an ni.
Kum 1944 April ni 14 khan Indo lawng lian tak ‘Fort Stikine’ an tih chuan Mumbai lawngchawlh hmun a lo thleng a. He lawng, ralthuam leh bomb lam chi tam tak phur hi a kang ta vak mai a. He kangmei chhuak rapthlak takah hian kang thelhtu Bombay Fire Brigade mi 66 leh Bombay Salvage Corps mi 11 te chuan an nunna an chan phah a. Heng mitthi te hriatrengna atan hian Fire Service Day hi April 14-ah hian hman a ni ta a. April 14th -20th chhung chu Fire Service Week atan hman zui zel thin niin he Hapta chhung hian India rama Fire Service chi hrang hrang te chuan kangmei laka himna tur zirtirna an nei thin a ni.
He Fire Service Week chhung hian School hrang hrangah Fire Safety Awareness Programme hman a ni ang a. Sawrkar hmun pawimawh bik leh damdawi In hrang hrangte pawh kangmei laka invenna an neih that leh that loh endik nan hun hman a ni bawk dawn a. Fire & Emergency Services-a thawktute chuan Mei tel lo hian mihring a awm theih loh a, mitin tana pawimawh leh tangkai tak a ni tih sawiin, Kangmei erawh mihring te tan chhiatna, beidawnna leh tahna, piansualna leh thihna hial thlen thei a ni tih sawiin, kan rohlu In leh lo te meivapa chantirtu a nih avangin fimkhur tlan a tul thu an sawi a ni.
Comments
Post a Comment