Lenkawl

Mizoram Electoral Roll-a hming la chuang Tripura a inbengbel tawh si Bru vote nei mi 4,339-te hming chu Mizoram Electoral Roll atanga paih a ni tawh a, heti hian Bru vote nei mi 7,319 te hming paih hmabak a la awm a. Mizoram Assembly inthlan hunah chuan Tripura a awm Bru vote neite hming hi paih zawhfel hman tum a ni.

Serchhip District Football Championship 2023 chu Vawiin hian Final khelh a ni dawn.

Special Assistance to States for Capital Investment (SASCI) Scheme hnuaiah Mizoram sawrkar chuan Serchhip khawpui chhungah hna chi hrang hrang thawk turin ruahmanna a siam a, heng hnathawh tura ruahman leh hnathawh mek te hi Inrinni khan MNF Publicity Board Vice Chairman J. Malsawmzuala Vanchhawng hovin Serchhip-a MNF Block hruaitute chuan an tlawh a ni.

Ramchhung hmundangte rualin Inrinni khan Serchhip-ah Lok Adalat thutkhawm neih a ni.

Police zinga ruihhlo ngai leh ngawlveite enkawlna hmun tur leh Damdawi In khum 18 awmna chu Inrinni khan Police Training School (PTS) Thenzawl-ah Mizoram DGP Devesh Chandra Srivastva chuan a hawng.

Inrinni khan Serchhip P&E Veng-a Our Lady of Assumption Church-ah Deacon Jerome Lalrinsanga chu Puithiam atan a nemnghet. New Serchhip-a cheng Deacon Jerome Lalrinsanga s/o MC. Zatawna hi Aizawl Diocese Puithiam, Most. Rev. Stephen Rotluanga chuan Puithiam atan a nemnghet a, he hunah hian hmun hrang hrang atangin an Kohhran Puithiam te an tel a ni. Heti hian Serchhip Parish atangin Aizawl Diocese Puithiam 5 an chhuak ta a ni.

January, 2019 leh January, 2023 inkara Financial Institution leh Bank hrang hrang atanga Mizoram sawrkarin sum a puk zat chu Rs. 4345,45,30,387/- a ni tih Assembly inkhawm ah C. Lalsawivunga zawhna ziaka a chhanna-ah Finance changtu Chief Minister Zoramthanga chuan a tarlang a. Mizoram sawrkarin sum a pukna te hi NABARD, REC, National Cooperative Development Corporation, Power Finance Corporation Limited leh RBI kaltlanga Agency Bank hrang hrang atanga Open Market Borrowing te a nih thu a tarlang bawk.

Kum 2019 atanga 2023 chhungin Two Wheeler Taxi permit 2,955 pekchhuah a ni tawh a, Permit pekchhuah leh tumna emaw tum lohna emaw a awm rih lo. Assembly Budget Session neih mekah C. Lalsawivunga zawhna Transport Minister TJ. Lalnuntluanga’n a chhan danin, Two Wheeler Taxi permit hi Aizawl khawpui tan chauh pekchhuah niin District dang tan pekchhuah a la awm lo a. Kum 2019 ah pekchhuah awm lovin kum 2020-ah 1,709 leh kum 2021-ah 1,246 pekchhuah a ni a, kum 2022 leh 2023-ah Permit pekchhuah a la awm lo bawk.

Sports Minister Robert Romawia Royte hovin Inrinni khan Lengpui dai-a MSSC-REC Motorsports Racing Track siam hnathawh lai chu en ho a ni a, km 2.17-a thui he Racing Track siam nan hian REC chuan CSR Fund atangin cheng nuai 750 pein SASCI atangin cheng nuai 800 sanction hmuh a ni bawk.

Bureau of Civil Aviation Security (BCAS) Director General Zulfiqar Hasan leh a tawiawmtute chuan Inrinni khan Chief Minister Zoramthanga chu a Pisa-ah kawmin Lengpui Airport-a security chungchang an sawipui a, Bureau of Civil Aviation Security hi Ministry of Civil Aviation hnuaia Department pakhat niin, India ramchung a Domestic leh International Airport a Civil Flight himna atan hma a la a. Chief Minister an kawmna ah BCAS Director General chuan Mizoram chu State ralmuang leh him tak a ni chu vannei a tih thu a sawi a. Chutihrual chuan venhimna pawimawhna leh BCAS in Civil Flight himna atana zawm tur leh ruahmanna hrang hrang an duan te Chief Minister chu a sawipui a ni.