Serchhip khawpui chhunga SASCI Scheme atanga hnathawh tur leh hnathawh mek enfiah

Special Assistance to States for Capital Investment (SASCI) Scheme hnuaiah Mizoram sawrkar chuan Serchhip khawpui chhungah hna chi hrang hrang thawk turin ruahmanna a siam a, heng hnathawh tura ruahman leh hnathawh mek te hi Inrinni khan MNF Publicity Board Vice Chairman J. Malsawmzuala Vanchhawng hovin Serchhip-a MNF Block hruaitute chuan an tlawh a ni.
SASCI Scheme hnuaia hmalakna tur an tlawhna ah hian MNF Adviser ni bawk J. Malsawmzuala Vanchhawng chuan mipui tana thawk leh rawngbawl an nih angin SASCI Scheme hnuaia Serchhip tihhmasawnna tur khawchhunga hnathawh te chu rintlak leh tha taka thawh ni zel se a duh thu sawiin, mahni hlawkna tur chauh um lovin mipuiten an chhawr tangkai ngei theih turin tha taka hnathawh a pawimawh thu a sawi bawk.

Thudawn danin SASCI 2022-2023 hnuaiah hian Serchhip-ah hna thawh tur hrang 29 ruahman a ni a, heng te hi Footpath leh Handrailing siam tur hmun thum (IOC Veng leh New Serchhip)-ah te; PCC Step siam tur hmun thum (Leisang Veng, Kikawn leh Saron Veng)-ah te; Dinthar Vengsang leh P&E Veng Tlangnuam-a RCC balcony siam tur te; Field Veng-a RCC Step leh Link Drain siam tur te; Serchhip Chhim Veng-a kawng zauhna tur hmun pakhat te; Retaining Wall siamna tur hmun nga, New Serchhip, Zion Veng, Tuikhuah Veng leh P&E Veng-a hmun hnih te; SerchhipBoxing Hall bul-a Breast Wall siam tur te; Hume Pipe hmanga Culvert siam tur hmun thum te; Zion Veng, Vengchung leh New Serchhip-a Link Drain siam tur te; Inkalpawhna kawng PCC Flooring hmanga siamthat tur Vengchung, Saron Veng, Dinthar Veng leh New Serchhip Sub-Centre panna kawng bakah Bazar Tual PCC Flooring tihna tur leh Judicial Veng-a Retaining Wall leh Slab Culvert siam turte a ni a. Heng hna hrang hrangte hi PWD kaltlanga thawh niin hnathawh entu MNF Publicity Board Vice Chairman hi MNF East Block President H. Lalthianghlima leh a thawhpuiten an tawiawm a ni.