Kumin-a Mizoram Assembly inthlanpui hmain Tripura-a inbengbel Bru te hming paih hman tum a ni
Mizoram Electoral Roll-a hming la chuang Tripura a inbengbel tawh si Bru vote nei mi 4,339-te hming chu Mizoram Electoral Roll atanga paih a ni tawh a, heti hian Bru vote nei mi 7,319 te hming paih hmabak a la awm a. Mizoram Assembly inthlan hunah chuan Tripura a awm Bru vote neite hming hi paih zawhfel hman tum a ni.
Mizoram Election Department-a Joint Chief Electoral Officer David Liansanglura Pachuau sawi danin Tripura State Election Commission-in Bru vote nei, Tripura Electoral Roll-a an thun tawhte hming hi ERONet kaltlangin Mizoram Electoral Eoll a lo paih ve tura ngenna an rawn thawn thin a. ERONet hmanga an rawn thawn hi a kal chak theih loh avangin Bru vote neite hming paih hi duh angin kalpui chak theih a ni lo a. Tun thleng hian Bru vote nei 3,949 chu an hming paih turin Tripura hian an rawn thawn tawh a, an hming hi paih vek a ni tawh a. Hei bakah hian Tripura-a Electoral Roll-a an hming chuang tawh tih tihchianna Form an rawn thawn hmangin Bru vote nei 390 te hming chu Mizoram Electoral Roll atangin paih a ni tawh bawk a ni.
Kum 2018-a Mizoram assembly inthlanpui-ah khan Tripura-a pem thla tawh si Mizoram Electoral Roll a hming la chuang chu mi 11,658 an awm a, heng mite hi Tripura-a an inbenbel hnuah an hming hi Mizoram Electoral Roll atanga paih chhoh zel a ni a. Kumin kumtawp lama Mizoram Assembly inthlan hunah chuan Tripura-a awm Bru vote neite hming hi paih zawhfel hman tum a nih thu dawn a ni bawk.
Hetihlai hian Tripura State Election Commission lam chuan Tripura a inbengbel Bru 37,136 zinga mi 14,000 vel chuan tunkat Ningani a Tripura Assembly inthlanpui-ah vote an thlak thei dawn niin an sawi a. Tun dinhmunah Tripura-a inbengbel Bru ho zinga mi 21,703 te chu Vote nei thei tura ngaih an ni a, Electoral Roll-a thun chhoh mek an nih thu an sawi bawk.
Jan. 16, 2020-a sawrkar laipui, Mizoram leh Tripura sawrkar leh Bru pawl hrang hrang hruaitute'n Delhi-a inremna an siam angin vawi tam tak Mizoram lama kir tura ruahmanna siam a nih hnu pawha kir duh lo Bru te chu Tripura a an inbenbel phalsak an ni a. Inbengbelte chu Tripura Electoral Roll-a thun zel tura tih niin hemi hnu hian Mizorama vote nei Bru-te hi Tripura lam chuan Electoral Roll-ah thunin, an thun tih an rawn hriattir apiang chu Mizoram Election Department-in an hming an lo paih ve ta zel a ni.