Lenkawl

Serchhip khawpui chhunga National Highway-54 kawngpui chhe nasa lai ber, Serchhip Dinthar Veng-a Sesah luikam Blacktopping hna chu nizan khan NHIDCL hnuaia KRAM Infracon Pvt. Ltd. chuan an thawk a, helai kawng siamthat a nih theih nan hian bialtu MLA Lalduhoma bakah Serchhip Sub-Hqrs. YMA leh Dinthar VC te chuan tunhnai khan nasa taka hma la in hemi ang hian kawng siamthat hna hi thawh a ni.

Nimin-a Mizoram Legislative Assembly thutkhawm ah ‘Mizo Language Development Board Bill, 2022’ chu putluh niin lungrual taka pawm a ni a, Chief Minister chuan, “Mizote inpumkhat theih nana phuarkhawmtu tur a ni,” a ti. Hei bakah hian nimin khan mumal zawka thlai leh sa man bithliah a nih theihna tur, ‘The Mizoram Market (Regulation and Facilitation) Bill, 2022’ leh ‘The Mizoram Ease of Doing Business Bill, 2022’ chu pass a ni bawk.

Nimin khan Serchhip Dinthar Branch KTP te chuan Serchhip Blood Bank-a dah turin thisen Unit 14 an pe a, thisen petute hi mipa 11 leh hmei-chhia pathum niin heng mi tlawmngai te hi Serchhip Blood Bank-ah kalin thisen hi an pe a ni.

Nimin khan Serchhip District-ah COVID-19 hri kai mi 44 hmuhchhuah leh an ni a, Serchhip District-ah hri kai enkawllai mi 419 an la awm mek a ni.

Tunhnaia Chief Minister in a hawn tak Serchhip District chhunga AYUSH Health and Wellness Centre pahnih te chu mipui ten tangkai takin an hmang mek a, nitin-a OPD an hawn thin pawh pantu mi 10-15 vel awm ziah anga chhut niin heng OPD-a inentir te hnenah hian a thlawnin damdawi pawh pekchhuah thin an ni.

Higher & Technical Education Minister Dr. R. Lalthangliana chuan National Institute of Technology (NIT) Lengpui atan Land Lease tihfel a ni tawh tih nimin Assembly Session-ah sawiin, building sakna atan Central atangin sum hmuh a la ni lo tih a sawi bawk.

Mizoram Chief Minister Zoramthanga chuan Mizoram tlawha rawn zin Vice President M. Venkaiah Naidu pualin nimin zing khan Raj Bhavan-ah tukthuan a buatsaih a. He hunah hian Governor Hari Babu Kambhampati leh Cabinet Minister-te an tel a ni.

Taxation Department changtu Minister Lalchamliana chuan kum 2020 June thla atanga kumin January thla thlengin Petrol leh Diesel atangin chhiah cheng vbc. 229 chuang hmuh a nih thu leh tunhnaiah tuialhthei atanga chhiah lak chu nasa taka tihhniam a nih thu House a hrilh.

Mizoram Legislative Assembly 8-na thut-khawm vawi 9-na, Budget Session nibawk chu nimin tlai dar 4:40 vel khan zawhfel a ni.

Mizoram-ah ni khat-a COVID-19 hri kai hmuhchhuah an tlem ve hret hret zel a, niminpiah khan Mizoram pumah Sample 2693 enfiah niin heng atang hian hri kai mi 474 hmuh belh leh an ni a, Sample enfiah atanga za zela 17.60 te chuan hri an kai a ni.