Serchhip District-a AYUSH Health and Wellness Centre hawn te mipuiin an chhawr tangkai
Tunhnaia Chief Minister in a hawn tak Serchhip District chhunga AYUSH Health and Wellness Centre pahnih te chu mipui ten tangkai takin an hmang mek a, nitin-a OPD an hawn thin pawh pantu mi 10-15 vel awm ziah anga chhut niin heng OPD-a inentir te hnenah hian a thlawnin damdawi pawh pekchhuah thin an ni.
Tun thla ni 3-a Chief Minister in Mizoram-a AYUSH Health and Wellness Centre Unit 24 a hawn zinga Serchhip District atanga tel New Serchhip leh Keitum-a AYUSH Health and Wellness Centre te hi nimin khan LENKAWL chuan an hmalak dan leh hnathawh dan te zawtfiahin, New Serchhip AYUSH Health and Wellness Centre-a Medical Officer Lalmuanpuii chuan nikum September thla atang khan OPD an kalpui thu sawiin, chawhrualin nitin mi 10-15 velin an pan thu leh heng mite hnenah hian an mamawh ang damdawi pawh a thlawnin an pe thin tih a sawi a. Hetianga OPD an hawn bakah hian NHM hnuaia hriselna lama Programme chi hrang hrang an kalpui te pawh kalpui vek a ni tih a sawi a ni.
Keitum AYUSH HWC-a Medical Officer Dr. Lalrinmawii chuan nikum April thla atang khan OPD an kalpui thu leh nitin mi 10-15 velin an pan thin thu a sawi a, OPD pantu hi an ngah chang chuan mi 20 vel lai te pawh an nih thu sawiin, Keitum atang hian Doctor-a inentir turin Serchhip-a kal a tul thin avanga mipui ten harsatna an tawh thin chu an khua ah ngei Doctor rawn tur a awm tak avangin mipuite pawh an lawm hle nia an hriat thu a sawi a. Nikum December thla atanga regular taka Fitness Class an kalpui pawh mipui ten an chhawr tangkai hle tih a sawi a, hei hi mipui ten awmze nei-a insawizawi chu hriselna atan a pawimawh zia an hriat theihna tura ruahman a nih thu a sawi bawk.
AYUSH Health & Wellness Centre in a tum ber chu hrisel nan a tha zawnga nundan leh ei leh in thlak danglam a ni a, Ramhmul Damdawi chawikan chu an thiltum langsar niin, kan ram-a tualto thing leh thlai, natna enkawlna atana hman theih tur phun te, Faina kawng leh hetiang lama inzirtirna neih te a ni a, tunah hian kum 18 chunglam chin te hriselna dinhmun endik an kalpui mek a ni.
Thudawn danin Mizoram-a Health Sub-Centre hrang hrangte chu sawrkar chuan Health and Wellness Centre-ah hlangkai turin hma a la a, National Health Mission (NHM) chuan Health Sub-Centre zinga zaa 90-ah hma la in AYUSH chuan zaa 10 an kalpui dawn thung a, hemi ang hian AYUSH hian Health Sub-Centre 32 chu Health and Wellness Centre atan hian an kalpui dawn a ni. Tun thla ni 3 khan Chief Minister Zoramthanga chuan heng Health and Wellness Centre 32 zinga 24 chu hawngin hawn hmabak 8 a la awm a ni. Heng AYUSH Health and Wellness Centre te hi Ayurvedic Doctor te chuan thutchilhin Health Worker, ASHA leh Physical & Fitness Instructor bakah IV-Grade te an awm anga, kar khatah Fitness Instructor ho hian damlo enkawl ngai ten vawi hnih hun an hmang ho thin dawn a ni.