Petrol leh Diesel atangin sawrkar in Chhiah hmu tam

Taxation Department changtu Minister Lalchamliana chuan kum 2020 June thla atanga kumin January thla thlengin Petrol leh Diesel atangin chhiah cheng vbc. 229 chuang hmuh a nih thu leh tunhnaiah tuialhthei atanga chhiah lak chu nasa taka tihhniam a nih thu House a hrilh.

Nimin-a Assembly Session neihah Congress Legislature Party Leader Zodintluanga zawhna chhangin Lalchamliana chuan, kum 2020 June thla atanga kum 2021 March chhungin Petrol leh Diesel atanga chhiah hmuh chu Rs. 84,56,41,098/- a nih thu leh kum 2021 April atanga kumin January chhunga chhiah hmuh chu Rs. 1,44,78,49,254/- a nih thu sawiin, kum 2020 June atanga kumin January thlenga tuialhthei atanga chhiah hmuh chu Rs. 2,29,34,90,352/- a nih thu a sawi.

Hei bakah hian kum 2020 June atanga Petrol leh Diesel atanga chhiah lak tihpun a nih thu leh chhiah pun dan sawi belh bawkin chhiah tihpun hma kum 2019 - March 2020 chhungin vbc. 84.43 a lut a, chhiah tihpun hnu June 2020 atanga March 2021 chhungin vbc. 84.56 lutin, chhiah tihpun hnuaa a punna chu cheng nuai 13.02 a nih thu a sawi.

Zodintluanga'n Petrol leh Diesel atanga chhiah lak tihhniam tumna a awm em? tia a zawhna chu chhangin Taxation Minister chuan, tunhnaiah Petrol leh Diesel-ah VAT rate chu nasa taka tih hniam a nih thu a sawi a, eptu lam erawh in chhiah tihsan chauh an sawi a, a tihhniam lam erawh an sawi ve duh lo tih a sawi a. Chhiah lak tihhniam a nih dan sawi chhunzawmin, tuialthei-a chhiah lak tihhniamna order chu nikum November khan tihchhuah a nih thu te, Petrol-ah chhiah zaa 10.5 in tihhniam niin, Petrol man chu Rs. 101.30 atangin Rs. 94.30-ah a tlakhniam thu a sawi a, Diesel-ah chhiah lak zaa 10.8-a tihniamin, litre khat Rs. 86.37 atangin Rs. 79.36 ah tihhniam a nih thu a sawi bawk.