Budget Session zawhfel a ni

Zonuna Kawlni (LENKAWL) • March 11, 2022 • Comments • Mizoram

Mizoram Legislative Assembly 8-na thut-khawm vawi 9-na, Budget Session nibawk chu nimin tlai dar 4:40 vel khan zawhfel a ni.

Feb. 22, 2022 atang thutkhawm neih ah hian thutkhawm tan ni-ah Larsap Dr. Haribabu Khambampati chuan House chhungah thu sawiin Larsap thu sawi chungchanga lawmthu sawina, Motion of Thanks chu sawiho a nih hnuah pawm a ni a, thut-khawm neih chhung hian member hlui boral mi 4 te sunna hun hman niin thutkhawm neih chhung hian Sawrkar lehkha pawimawh 16 House-ah pharh a ni a, report 4 pharh a ni bawk.

Session-ah hian Bill 7 lutte pawm vek a ni a, Aizawl North II bialtu MLA, Dr. Vanlal-thlana'n Private Member's Bill a putluh, The Mizoram Private Transport Workers (Welfare) Bill, 2022 chu sawi ho a nih hnuah hnawl a ni a. Private Members’ Resolution 65 dawn chu pawm vek ni mahse, Private Member Cill sawi hmasak a nih avangin Private Members’ Resolution chu sawiho hman a ni ta lo a ni.

Budget Session neih zawh takah hian House-a chhan chi zawhna, Starred Questions 569 lutin heng zinga 562 chu pawm a ni a, list of Business-ah zawhna 200 dah niin, House-ah zawhna 47 chhan hman a ni a, chhan hman loh 153 a awm a. Ziaka chhan chi zawhna, Unstarred Questions 283 lut zinga 282 pawm niin, pakhat hnawl a ni a, Starred Question atanga Unstarred Questions-a leh zawhna 323 a awm bawk a ni.