Lenkawl

Catholic Hmeichhe Pawl, Assumption Parish, Serchhip te chuan Myanmar atanga Mizoram a rawn raltlan te tanpuina tur chi hrang hrang chu nimin khan Serchhip Sub-Hqrs. YMA kaltlangin an hlan.

Serchhip District-ah Vawk hri leng mek, African Swine Fever (ASF) avangin Vawk thi ala awm belh ve zel a, nimin khan Thentlang-ah Vawk pathum thiin Khawlailung-ah Vawk pakhat a thi leh bawk a ni. Heti hian nimin thleng khan Serchhip District-a ASF hri lenna khaw 35-ah Vawk 3716 lai a thi ta a ni. Nimin khan Thentlang khua ah hian Vawk 7 suat niin Chanmari Veng-ah Vawk pathum leh Piler khua ah Vawk pakhat suat a ni bawk a, nimin a Vawk suat zawng hi 11 niin Serchhip District-a ASF hri lenna hmun a Vawk suat tawh chu 2998 a tling ta bawk a ni.

Nimin khan Serchhip-ah District Task Force on Beti Bachao Beti Padhao chu thukhawmin kum 2020-21 Action Plan kalpui tawh dan an thlir-let bakah kum 2021-22 Action Plan tur an duang nghal.

Nimin khan Serchhip District-ah COVID-19 hri kai mi 49 hmuh belh leh niin hri kai zinga mi 70 te enkawl dam an ni thung.

Serchhip District Elder Helpline Authority chu nimin khan Serchhip District Bawrhsap hova thukhawmin khua leh tui kum upa zawkte tana Helpline kalpui mekah Serchhip District hmalakna tur awm theite leh Service Offices (Line Department) ten lo inbuatsaihna an mamawh awm thei te an sawiho.

Aviation Minister nen inbia

Mizoram MP pahnih leh OSD to Chief Minister te chuan Ministry of Health & Family Welfare-a Secretary Rajesh Bhushan chu niminpiah tlai khan hmuin Mizoram in COVID-19 hripui vanga harsatna a tawh mek chungchang ah Central sawrkar tanpuina an ngen.

Rampum huap-a thingtlang khaw fai thlanna tur, Swachh Survekshan Grameen, 2021 chu kalpui a ni leh dawn a, Swachh Survekshan Grameen, 2021 hawnna leh hemi atana ‘State Level Workshop on Swachh Survekshan Grameen, 2021’ buatsaih chu nimin khan Deputy Chief Minister, Tawnluia hovin neih a ni.

Azaadi Ka Amrit Mahotsav Plan hnuaia hmalakna kal mekah nimin khan Serchhip-a Village Council Member te tan Bawlhhlawh sawngbawl dan inzirtirna neih a ni a, Serchhip khawpui chhungah pawh bawlhhlawh paih turte thliarhran a nih tawh dawn thu he hunah hian tarlan a ni.

Serchhip District Medical Superintendent Dr. ZD. Lalmuanawma chuan niminpiah khan COVID-19 hri a kai tih hmuhchhuah a ni a, amah hi tunhnaia hrisel lohna nei sa a nih bakah Oxygen Level a hniam deuh avangin ZMC-a enkawl tura tih niin nizan hmasa khan ZMC-ah lak niin ICU-ah enkawl mek a ni.