Serchhip District-a kum upa te tanpuina turin Helpline 14567 biakpawh theih a ni tawh

Serchhip District Elder Helpline Authority chu nimin khan Serchhip District Bawrhsap hova thukhawmin khua leh tui kum upa zawkte tana Helpline kalpui mekah Serchhip District hmalakna tur awm theite leh Service Offices (Line Department) ten lo inbuatsaihna an mamawh awm thei te an sawiho.

He thutkhawm Serchhip DC Office Chamber-a neih ah hian Ministry of Social Justice & Empowerment, Govt. of India chuan kum upa zawk (Senior Citizen) a mamawhtu apiangte tana Elder Line a duan thu leh, a number chu 14567 a ni tih tarlan a ni a. Mizoram-ah pawh Elder Line hi kalpui tawh niin Serchhip District pawhin Field Response Office a nei a. A mamawhtu apiangte tan biakpawhtheihin a awm tawh tih tarlan a ni bawk.

He Helpline in a tum ber chu India khua leh tui dik tak, kum 60 chunglam ten hrisel taka an nun hlim leh zalen taka an hman theih a ni a. Sawrkar, NGO leh mithiamte kaltlanga an harsatna chiang taka hriatpui leh tanpui an ngaihna zawn apianga tanpui chu a tum niin sawrkar Scheme hrang hrang an hriat duhte, sawrkar hmalakna a zawhna an neihte, lungawilohna an neih te a thlenna tur hmun dap sakte chu a ngaipawimawh hle a ni. Hei bakah hian an hriselna atana an hriattur thil te, Tar chawmna (Old Age Pension Scheme) thil te, nitin nuna an mamawh hrilhhriatte, Dan leh a kaihhnawih thil ah te, an mimal buaina dang chinfel sak kawngah te, sum leh pai leh an pension thila hriat duh an neih te, tihduhdahna tuarte chhawmdawl te, enkawltu neilote awm zel dan tur dappui te, an taksa mamawh dappui leh rilru lama harsatna an neih leh tanpui an ngaihna kawng tinrenga lo tanpui dan dappui chu he Helpline hian a bawhzui pui thin dawn a ni.

Kum upa ten Helpline kaltlanga an mamawh an thlente District lama a tul anga lo bawhzui nghal zel tur, Services Office te chu he thutkhawm ah hian an tel a, chungte chu District Social Welfare Office te, Police Department te, Health Department te, District & Sub-Divisional Magistrate te leh District Legal Service Authority te an ni a. Dan lam thila harsatna nei apiangte tan hian District Legal Service Authority hian Serchhip District chhungah Para Legal Volunteer hi pasarih (7) an nei mek bawk a ni. Helpline hian a mamawh neia anmahni bepawptute chu Field Response Office leh Services Office te nena tangrualin an mamawhte a dap sak thin dawn a ni.