Chanchin thar thenkhat :

Aviation Minister nen inbia

Mizoram Chief Minister Zoramthanga leh Union Minister of Civil Aviation Jyotiraditya Scindia chuan nimin khan Virtual Meeting an nei a. He hunah hian Union Minister leh Chief Minister hian Aviation tihhmasawn pawimawhna te sawi dunin, Mizoram chu a thenawm State dangte nen Thlawhna hmanga awlsam zawka inkal-pawhna tur flight tam zawk a awm theih chu sawrkar laipui pawhin a duhsakpui thu leh a remchan anga hma a lakpui tur thu Union Minister hian a sawi a ni.

Raltlan te zirna tur sawiho

Myanmar atanga Mizoram-a raltlan zirlai naupang ten zirna an chhunzawm theih dan tur chungchang sawihona chu niminpiah tlai khan School Education Minister, Lalchhandama Ralte hovin Online-a neih a ni. He Meeting-ah hian District hrang hranga DEO ten an District huamc-hhunga raltlan zinga naupang sikul kal rual an neih dan te leh hemi atana an mamawh te an sawi a. MBSE hnuaia Pawl X leh XII te pawh an exam ve theih dan tur sawiho tel niin Mizo-ram-a Myanmar raltlan zinga zirlai awm zat atang hian hma lak zel a nih theih nan Data tul ang te lakhawmin ruahmanna siam a ni a, hei hi Central sawrkar lamah tunkar hian thawn thlak leh tura hmalak a ni.

Essay lawmman semna nei

Kumin April 14-20 chhunga ‘Fire Service Week’ hman denchhena zirlai naupangte puala Essay Writing Competition buatsaih lawmman chu nimin khan sem a ni a, he Essay inziahsiakna ah hian ‘Kangmei chhuak thulha kangthelhna hmanrua nena lo inrinlawk hi kan himna a ni’ tih chu thupui-ah hman niin Lalrinpuii (Class-IX), Synod Higher Secondary School, Aizawl chu pakhatna niin Rs. 3000/- a dawng a, C. Lalruatzuali (Class-IX), BC Lalthlamuana English Academy School, Champhai chu pahnihna niin Elizabeth Lalthanpuii (Class-IX), Downtown English School, Lawngtlai chu pathumna a ni bawk.

ZPM in candidate puang

ZPM Party chuan Tuirial Bial Assembly bye-election neih tura an Candidate puanna leh Val Upa Council thutiamna hun chu nimin khan Aizawl-a an Office-ah an buatsaih a, he hunah hian ZPM President Lalliansawta chuan an MLA boralta Andrew H. Thangliana duh ang leh tumte tipuitling turin theihtawp an chhuah zui dawn tih a sawi. He hunah hian an Candidate Laltlanmawia chuan Pa-thian hmachhuanin he Bial-ah hian a ding dawn tih a sawi a ni. ZPM Candidate tur Laltlanmawia hi Kolasib Hmar Veng-a cheng niin kum 1975-a piang a ni a, thiamna lamah BA niin nupui fanau nei-a khawsa lai a ni.

MPCC in vaccine pekna tlawh

Mizoram Pradesh Congress Committee (MPCC) Media Department chuan nimin leh niminpiah khan Mizoram Sawrkarin COVID-19 Vacine a pekna hmun, Dawrpui Multipurpose Centre leh Cultural Centre, Bawngkawn South ami te chu an tlawh tih sawiin, tlawmngai a thawk Volunteer te inpekna chu chhuanawm an tih thu an sawi a. Vaccine petu Volunteer-te hi MNF sawrkarin an chhun thingpui in na tur pawh a tumsak thei tawh lo nia sawiin, lawmman beitham tak an dawn thin pawh April, 2021 atangin a pe thei tawh lo niin thuchhuah siamin an tarlang bawk.

Hriattirna tichhuak dawn

October 30, 2021-a Tuirial Assembly bial bye-election neih tur atan Vawiin hian hriattirna tihchhuah a ni dawn a, inthlanna chuh tum te tan hming pekluhna hun hawn nghal a ni ang. Nimin khan he inthlanna neih tur chungchangah hian Mizoram CEO P. Jawahar chuan Political Party hrang hrang aiawhte Kolasib-ah kokhawmin he inthlanna kalpui dan tur leh ECI atanga kaihhruaina awm ang ang inhrilhfiah a ni a. CEO chuan ECI in inthlan hun tur a puan tawh avangin Model Code of Conduct pawh Kolasib District pumah hman nghal a nih thu leh COVID-19 hrilen avangin Political Party hrang hrang leh an Candidate te chu Campaign hmunah pawh fimkhur taka Covid Protocol zawm tlat tur a nih thu a sawi bawk. He inthlanna a Vote thlak ni tur hi Kohhran then-khat tan ni serh a nih avangin Vote thlak hun hi tlai dar 6:00 thleng atan pawhsei a ni bawk.