Union Health Secretary hnenah tanpuina dil

Mizoram MP pahnih leh OSD to Chief Minister te chuan Ministry of Health & Family Welfare-a Secretary Rajesh Bhushan chu niminpiah tlai khan hmuin Mizoram in COVID-19 hripui vanga harsatna a tawh mek chungchang ah Central sawrkar tanpuina an ngen.

Lok Sabha MP C. Lalrosanga leh Rajya Sabha MP K. Vanlalvena bakah OSD to Chief Minister Rosangzuala te hian Union Health Secretary hi a Pisa-ah hmuin Lok Sabha MP hian Mizoram dinhmun tlangpui a sawi a. Hri vei mek leh nitin hri kai thar an pun chak avangin Mizoram chuan he hripui do nan hian damdawi leh Covid dona hmanraw tam zawk a mamawhin Central sawrkar tanpuina a mamawh tak zet tih a hrilh a ni.

He hunah hian Rajesh Bhushan chuan Covid hripui dona tura Central sawrkarin State leh UT zawng zawng tan Emergency Covid Response Package (ECRP) hnuaia a sum dah cheng vbc. 14744.99 atangin Mizoram chu cheng vbc. 44.38 pek a nih thu leh First installment cheng vbc. 19.94 chu pekchhuah a ni tawh tih a lo sawi a. First Installment hmanna thehluh veleh a bak sum la awm pawh pekchhuah leh nghal tur a ni tih a sawi a ni.

Mizoram MP te chuan Covid hripui vanga harsatna chi hrang hrang te leh Mizoram sawrkarin a hmachhawn dan tlangpui tarlangin, Vaccination Programme kalpui dan pawh an sawi a. Mizoram in Vaccination programme hi a tih that viau rualin hri kai thar an pun chak em avangin ICU khum tam zawk te, khawl tha leh RT-PCR Mobile Van te chu mamawhna a nasa hle a ni tih an sawi a. Hripui vanga chhiatna hmachhawn turin ECRP hnuaia Mizoram tana sum ruahman pangngai piah lamah Central sawrkar tanpuina a mamawh tak zet tih an sawi a. Hei bakah hian Mizoram-a Covid dinhmun uluk taka rawn enfiah a zirchiang turin Expert Team rawn tirh ni se tiin Union Health Secretary hnenah an sawi bawk a ni.

Union Health Secretary chuan MP ten Mizoram dinhmun an sawi leh harsatna an thlen te chu thuneitu sang zawkte nen lo sawiho a nih tur thu leh Mizorama Expert Team rawn tirh thuai a nih tur thu a sawi a. Covid damlo te enkawlna damdawi, drip-a khai tel chi damdawi manto, Rs.120,000/- man Monoclonal Antobodies Cocktail (MAC)chu Mizoram sawrkarin an dil chuan an pek theih thu a lo hrilh bawk a ni.

Union Health Secretary chuan Covid hripui dona kawnga hma a lak danah Mizoram sawrkar chu fakin, tun thlenga Covid thihna a la thleng tam lutuk lo chu thil lawmawm tak a ni, a ti a. Hripui vanga Mizoram harsatna sukiang tur leh a tul anga sum leh pai tanpuina pe turin theihtawp chhuah a inhuam thu a lo hrilh bawk a ni.