Latest News

Rampum huap thingtlang khaw fai thlanna kalpui turin Deputy Chief Minister in a hawng

Rampum huap-a thingtlang khaw fai thlanna tur, Swachh Survekshan Grameen, 2021 chu kalpui a ni leh dawn a, Swachh Survekshan Grameen, 2021 hawnna leh hemi atana ‘State Level Workshop on Swachh Survekshan Grameen, 2021’ buatsaih chu nimin khan Deputy Chief Minister, Tawnluia hovin neih a ni.

Swachh Survekshan Grameen-2021 hawnna hi Zoom kaltlangin nimin khan neih niin District tina Deputy Commissioner leh PHE Officials te telin he hunah hian PHE Department changtu Deputy Chief Minister Tawnluia chuan sawrkar laipui-a Ministry of Jal Shakti-a Department of Drinking Water & Sanitation chuan Swachh Survekshan Grameen-2021 hi a huaihawt leh dawn tih sawiin, hei hi India ram puma Thingtlang khua zawng zawng huap Faina kawnga inelna a nih thu a sawi bawk. He inelna hi Third Party- IPSOS Pvt. Ltd. te kaltlanga huaihawt niin, an ni hian State hrang hrang te hmalakna endikin, khawtlang hruaitute leh mipuite atangin feedback la in, Assessment a siam dawn tih Deputy Chief Minister chuan sawiin, inelna ringawt nilova, mipuite thinlunga faina kawnga hmasawnna tuh zel chu sawrkar mawhphurhna a ni a, chutih rualin a khawtual mi ten sawrkar thu zawm a, faina kawnga hmalakna tawiawm chu Zoram tana hmasawnna leh changkangna bakah mawina thlentu a ni tih a sawi bawk.

Nimin-a Swachh Survekshan Grameen-2021 hawnna neih zawh hnu hian Aizawl-a PHED Conference Hall-ah State Level Workshop neih zui nghal a ni a, SSG inelnaah hian Fullmark 1000 niin tehfung pathum a awm dawn a, Mobile hmanga mipuite Fedback-ah 350, Khaw thlan bik te survey-ah 300 leh District tinin an hnathawh an report atangin mark 350 te a ni ang.

Kum 2018 atang khan Swachh Survek-shan Grameen hi huaihawt a lo ni tawh thin a. Hemi kum hian India ram thingtlang khaw 7000 endik niin, kum 2019-ah khaw 17200 endik a lo ni tawh bawk a. Kumin ah hian 17425 vel endik tum a ni. Kum 2019-ah khan Mizoram chuan Category hrang hrangah hetiang hian lawmman pakhatna Smaller States and UT zingah leh North-East States zingah a lo dawng tawh a. District pathum- Kolasib, Serchhip leh Aizawl-te chuan NE-ah lawmman pakhatna atanga pathumna an lo la tawh bawk a ni.

Comments

Chhiar Hlawhte