Sangha tharchhuah tam lama hma kan sawn theih nan thapui thawh mek a ni - Chief Minister

Mizoram-a Sangha khawitute intawhkhawmna, Mizoram Fish Farmers' Meet chu nimin khan Aizawl-a Dawrpui Multipurpose Hall-ah neih a ni a, he hun hi Chief Minister Lalduhoma chuan telpuiin Sangha tharchhuah tam lama hma kan sawn theih nan Fisheries Minister kaihhruaina hnuaiah thapui thawh mek a nih thu a sawi a ni.

Fisheries Department bultuma Mizoram-a Sangha khawitute intawhkhawmna hunah hian Chief Minister Lalduhoma chuan Mizoram-ah Sangha khawi theihna ram Hectare 24,000 vel kan neih thu leh chung zinga ram Hectare 6,000 velah chuan Sangha Dil kan neih mek thu sawiin, “Za zela 25 vel chauh a la ni a. Phur za hmun nei chunga phur 25 thar theihna chauh la siam ang kan ni,” a ti a. Sangha tharchhuah lama Mizoram harsatna langsar chu Dil kan la nei tlem leh kan tharchhuahte dah thatna kan la nei tha tawk lo bakah kan Dil neih mekte atanga kan tharchhuah that zawng (Fish Productivity per Hectare) a la hniam bawk tih a sawi a. “Vawiin-a kan ngaihtuah hmasak tur nia lang chu ‘Kan thar hlawk tawk em?’ tih hi a ni. Sangha Dil thar kan laih belh thei rih lo a nih pawhin kan neihchhunte thar hlawktir lamah tan kan la thei a ni,” a ti a. “Sangha Dil neituten hlawk zawka kan tharchhuah theih nan tunlai thiamna thar ber ber kan hman ve a ngaiin ka ring a. Sangha hrisel zawk neih dan te, a chaw lama kan hriat tur chi te, Dil enkawl dan dik leh kan hnathawhna lama kan mamawh apiang kan ngaihven a, kan hriat ve zel a tha,” a ti bawk.

Sangha tharchhuah tam lama hma kan sawn theih nan Fisheries Minister kaihhruaina hnuaiah thapui an thawh mek thu Chief Minister Lalduhoma chuan sawiin, “Scheme hrang hrang Blue Revolution te, Prandhan Mantri Matsya Sampada Yojana (PMMSY) leh Bana Kaih (Handholding) Scheme hmangte in hma kan la a. PMMSY 2.0 hi kalpui chhunzawm kan beisei avangin a lo chhuah huna kan kalpui ve nghal theih nan Action Plan pawh kan siam,” a ti a. “Mizoram Flagship Scheme Bana Kaih thawhkhatna CM Special Package atangin Sangha Dil siamtu mi 201 te Ban-ah kan kai a. Loan Component hmangin mi 14 te Ban-ah kan kai bawk a. A thawh hnihna hi nikum September thla atang khan kan tan leh a, CM Special Package hmangin mi 27 te kan thawhpui a, Loan component atangin mi 5 te kan thawhpui leh tawh a. Sangha Dil kan neih belh chho zel a. Thawh hnihna hi la kalpui mek a ni a, dilna te pawh hi thehluh theihin kan hawng reng a. Mi in thawhpuitlak ruahmanna (Project Proposal) a neih kha chuan kan thawhpui zel mai dawn a ni,” a ti a. “Kan Sangha tharchhuahte kan Bazar-ah awlsam taka kan hmuh theih nan Chain Cold Storage Facility kan mamawh a, a tam thei ang ber neih kan tum dawn a ni,” a ti bawk.

Mizoram-a Sangha khawitute intawhkhawmna ah hian Fisheries Director, Zonuntluangi chuan inlawmna thu sawiin, khual zahawm Fisheries Minister Lalthansanga chuan Fisheries Department chu mumal lehzualin an kal tan tih a sawi a, “Induhsakna hmanga tanpuina inpek mai thin ang chi tihbo tumin kalphung thar kan siam a. A phute chauhin Sangha khawi tanpuina hi dawng se kan duh a ni,” a ti. 

Nimin-a he hun hman ah hian Bank lama thawktuten Sangha khawitute tana Bank Loan lak theih dan an zirtir a, Farmers ten an harsatna hrang hrang sawichhuakin, Sangha enkawl dan zirhona an nei a, Fisheries Department changtu Secretary Er. Lalrothanga chuan Sangha khawitute harsatna hrang hrang sawite leh Survey an neihte a khaikhawm bawk a. He hunah hian Sangha khawitu hlawhtling te thusawi ngaihthlak niin lawmman sem a ni a, District tina Best Fish Farmer thlanchhuah te hnenah lawmman sem niin Serchhip District atangin Lalhmunsanga, Serchhip Dinthar Veng chuan he chawimawina hi dawngin Serchhip District atang pawhin Sangha khawitu thahnem tak an tel a ni.