Aizawl-ah World AIDS Orphan Day hman a ni

World AIDS Orphan Day chu nimin khan Aizawl-a I&PR Auditorium-ah Gan Sabra buatsaihin hman a ni a, Mizoram State Commission for Protection of Child Rights, Chairperson Jimmy Laltlanmawia chuan he hun hi a hmanpui a ni.

World AIDS Orphan Day puala hun hman ah hian MSCPCR Chairman chuan naupangte rilru, taksa leh ngaihtuahna te a nihna tura ang taka an thanlenna tur atan chhungkaw tha an mamawh thu leh heng an chanvo chang theilo mi tam tak te chu Gan Sabra hmalakna in an chanvo dik tak pe turin an penchhuak thin tih a sawi a. Mizoram State Commission for Protection Child Rights chu India Ram Danpui in a ruahmanna hnuaia kum 2008 atanga din a nih thu sawiin, naupang ten an dikna chanvo an chan theihnan din a ni tih a sawi a. Naupang HIV/AIDS avanga vanduai te hmakhua leh thanlenna kawngah Sawrkar, Kohhran, Pawl, mimal tin ten mawhphurhna an nei theuh tih a sawi bawk.

Gan Sabra hi kum 2006 khan Lucy Remruati Chhange din a ni a, Gan Sabra hi naupang Fahrah, HIV/AIDS avanga harsatna tawk te enkawlna hmun a ni a, tunah hian naupang 300 vel enkawlin chhawmdawl hna a thawk mek a ni. An enkawl naupang zingah pawl 10 leh 12 pass chhuak an awm nual tawh bawk a ni.