e-stamping hmang dawn

Ram lei leh hralh bakah inremna hrang hrang siam nana hman thin ‘Non Judicial Stamp Paper’ aiah ‘e-stamping’ hman a nih theih nan nimin khan  LR&S Department leh Stock Holding Corporation of India ten thawhhona thuthlung an ziak.

He thawhhona thuthlung hi Land Revenue & Settlement (LR&S) Minister pisa-ah ziah niin Mizoram Sawrkar aiawhin LR&S Secretary Vanlalmawia IAS, leh SHCIL aiawhin Regional Manager (East & North East) Pritesh Kumar ten hming an ziak a. E-stamping hi a bul tan nan Aizawl District-ah Pilot project atan kalpui a ni dawn a. A tahtawlin District dangah pawh kalpui vek a ni ang. Pilot project hi ni 45 chhunga tihfel tura duan a ni a. A hlawhtlin hunah chuan mahni awm hmunah emaw, Accredited Collection Centres atangin emaw, Stamp Duty chu pek theih a ni tawh dawn a. Hei bakah hian Stamp indaihlo leh chatlak a awm tawh dawn lo a. Stamp duty hralhna leh leina bo thlau pawh a nuai bo dawn a ni tih Pritesh Kumar, Regional Manager, SHCIL chuan a sawi.

He hunah hian Revenue Minister B. Lalchhanzova pawhin Stamp duty chu State Sawrkar chan liau liau a nih angin a lakkhawm kawngah thahnem ngaih a tul thu sawiin, kum 2024-25 a Stamp Duty tlingkhawm chu cheng vbc. 13.45 a nih thu leh kum 2025-26 ah chuan cheng vbc. 20.2-ah a pun thu a sawi a. Kum 2026-27 chhungin Finance Department chuan Stamp Duty atangin cheng vbc. 22.5 a bituk a, e-stamping hman a nih dawn tak piah lamah Sub-Division Level-a Sub-Registration Office hawn a nih tak avangin Finance Department bituk zat hi khum ngei an inbeisei thu a sawi a. Revenue Minister chuan June ni 2, 2024-khan sawrkar chuan The Mizoram Stamp Rules siam tha (amend)-in electronic hmanga Stamp Duty pek phal a nih thu pawh a sawi bawk.