Pro Volleyball League vawi 9-na LPS Arena-ah khelh tan a ni ta
Mizoram Rural Bank Pro Volleyball League 2026 match hmasa berah hian nikum lama Final-a inhmachhawn Anastasia Electric Veng leh Thutak Nunpuitu Team (TNT) te inhmachhawnin Anastasia-in Trophy humhim thei turin tha takin bul an tan a, an match hmasa berah hian TNT hi 3-1 (26-24, 25-10, 21-25, 25-21) in an hneh a ni. Nikum lama TNT tana khel Zosangzuala (Mama) chuan Anastasia tan a match hmasa ber khelin ‘Kuriz Player of the Match’ atan thlan a ni nghal bawk.
Pro Volleyball League vawi 9-na hi LPS Arena, Falkland-ah khelh niin Mipa-ah Champion lai Anastasia Electric Veng bakah, Thutak Nunpuitu Team, Tuichangral, Khawbel, Sihphir, Hunthar leh Chhinga Veng Spikers te an inel dawn a, zan khat-ah match khat zel khel tura ruahman niin zan dar 8:00-ah inkhelh thin a ni dawn a, nizan khan Tuichangral leh Khawbel te inhmachhawnin zanin hian Sihphir leh Chhinga Veng Spikers inhmachhawnin Round 1-na khelh zawh a ni dawn a, June 10 leh 11-ah Semi Final khelin June 13-ah Final khelh a ni ang.
Hmeichhe lamah kumin hian Team pali an inhmachhawn dawn a, an vai hian Pro Volleyball la khel ngai lo vek niin June 1 atangin an khel tan dawn a, Hmeichhe inelna ah hian Tuichangral, Chhinga Veng Spikers, Eric Pautu Academy leh ITI Veng GSA te an inhmachhawn dawn a ni. Hmeichhe inelna ah hian a tan zan hian match hnih khelh a ni anga, zan dar 6:00-ah Eric Pautu Academy leh ITI Veng GSA inhmachhawnin dar 8:00-ah Chhinga Veng Spikers leh Tuichangral te an inhmachhawn dawn bawk a, Hmeichhe inelna ah hian Semi Final awm lovin point hmu sang pahnih ten Final an khel dawn a ni.
Comments
Post a Comment
I ngaihdan i sawi hian mipui ngaihdan i tarlang a ni!