Mat Multipurpose Dam buaipui mekah cheng vbc. 274 senna tur project duan fel a ni tawh

State Level DISHA Committee (SLDC) thutkhawm chu nimin khan an Chairman leh Chief Minister Lalduhoma hovin neih a ni a, he thutkhawm ah hian Mat Multipurpose Dam buaipui mek chu cheng vbc. 274 senna tur Project duan fel a nih tawh thu leh Brahmaputra Board ten a thawhna tur sum an dap zui dawn thu a sawi bawk.

Planning & Programme Implementation Conference Hall-a State Level DISHA Committee (SLDC) thutkhawm ah hian Chief Minister Lalduhoma chuan Sawrkar laipuiin Central Scheme sum hman dan leh inpek dan kalphung thar, SNA-SPARSH a hman tak hnuah Financial Year tawpa Account ti zero thei lo Department an awm avangin harsatna an tawk tih sawiin, hetiang hi awm tawh lo se a duh thu leh an tan tlan a ngaih thu a sawi a. Central Scheme kalpuitu Department-ten thawhho an thiam a, a remchanna apianga an inthlunzawm (convergence) hian hmalakna a chakin, an hlawhpui zawk thin tih sawiin, uar sauh sauh turin a chah a. Irrigation & Water Resources Department-in kum rei tak chhunga Central sawrkar rawn release theih loh an fund te tunhnaiah an hnukchhuak vek chu lawmthu sawiin, Central Scheme an kalpuinaah an lehkha thehluhte an umzui chak a ngai tih sawiin, “Chief Minister DO Letter han thawn a tul changte a awm bawk a. Inthlahrung lovin min rawn hriattir thuai ula, ka lo bawhzui zel ang. Kan MP Pu Richard Vanlalhmangaiha pawh a inhawng em em a ni,” tiin Department hrang hrangte chungah lawmthu a sawi a. “Kan hmalaknate hi kan ram leh hnam tan a ni tih hre rengin theihtawp i chhuah zel ang u,” a ti bawk.

He thutkhawm ah hian Chief Minister hmalaknaa Mat Multipurpose Dam buaipui mek chu cheng vbc. 274 senna tur project duan fel a nih thu leh ruahman danah chuan tuikhuah hi meter 29 a sang, hectare 700 a zau leilet a chawm thei, Power siamna awm, Eco-Tourism kalpui theihna tura duan a ni tih tarlan a ni a. Brahmaputra Board ten a thawhna tur sum an dap zui dawn thu tarlan a ni bawk.

State Level DISHA Committee-ah hian Central Scheme hrang hrang thawktu Department ten sawrkar kum 2025-26 a an hmalakna leh an hlawhtlinnate thlirho a ni a. Report a tarlan a nih danin, MGNREGA hnuaiah household 62,193 ten ni 100 inhlawhna an thawk a. Central sawrkar chuan he scheme hi VB GRAMG tia a thlak dawn avangin a kalpuina tur Mizoram Scheme hi duan fel tawh a ni a. Cabinet Meeting-in a ngaihtuah tura thehluh a ni.

PMAY-G 2.0 kalpuina turin Mizoram-ah survey neih zawh tawh a ni a. Chhungkaw 54,601 te chu he tanpuina dawng thei tura ngaih an ni a. PMAY-G sum Central-in a pekchhuah dan hi Mizoram kalphung nen a inmil tawk lo nia ngaih a ni a. A guideline siam tha tura dil nise an ti a. SAGY (Model Village) hmalakna chu engkim thawh zawh tawh a ni a, Central sawrkarah khar (close) tura lehkha thawn tawh niin SAGY Scheme thar hi a awm tawh dawn lo nia hriat a ni.

AH & Vety hnuaiah Animal Insurance under National Livestock Missions kalpui mek a ni a, mi 700 velin insurance hi ti tawhin ti tura beisei zat atanga zaa sawm (10%) vel chauhin an la ti a. National Health Missions report atanga a lan danin sawrkar kum kalta chhunga nu naupai inziaklut zawng zawng chu 20,137 an ni a. Damdawi In-a nau nei (Institutional Delivery) chu 17,201 an ni. Nau piang hlim boral 285 an awm a, Infant Mortality Rate (IMR) chu 15 niin 16 aia hniama awm hi target mek a ni a, target hi hlen (achieve) a ni.

Mizoram-ah Ministry of Tribal Affairs hnuaia hmasawnna hnathawh 82 a awm mek a, NESIDS (OTRI) hnuaiah project 19, NESIDS (Road) hnuaiah project 11 leh NEC hnuaiah project 48 te kalpui mek an ni. Hengte bakah hian ruahmanna thehluh mek engemaw zat a awm bawk a ni.