Territorial Army (Home & Hearth) a thawk tur Mizo thalai mi 144 te vailiam an ni

Chief Minister Lalduhoma chuan 166 Infantry Battalion Territorial Army (Home & Hearth) a thawk tur Mizo thalai thlanchhuah hmasa ber mi 144 te chu nimin khan Aizawl-a Assembly Annexe Building Conference Hall atangin a vailiam.

166 Infantry Battalion Territorial Army (Home & Hearth) a thawk tur Mizo thalai te hi mipa 135 leh hmeichhia 9, an vaiin mi 144 niin heng mite hian thla thar atang khian Training an nei dawn a, chumi hmaa tihfel ngaite tifel turin tun thla laihawl, May 15, 2026 khian Shillong an pan dawn a. Mipa 135 te hian Shillong-ah Training an nei zui anga, hmeichhia 9 te hian Bangalore-ah training an nei dawn thung a ni.

Nimin-a heng mite vailiamna hunah hian Chief Minister Lalduhoma chuan he ni hi Mizoram tana ni lawmawm leh chhinchhiahtlak a nih thu sawiin, “Territorial Army hi a awm tih pawh tunhmain ka lo la hre ngai lova, kan hriat rualin Central sawrkar thuneitute hnenah Mizo Battalion min pe ve turin ka dil nghal a. A tirah mi 70 lak min phalsak a, a taka kan lak hmain kan dil belh leh a, mi 144 lak min phalsak ta a. Prime Minister Pu Narendra Modi, Union Home Minister Pu Amit Shah, Defence Minister Pu Rajnath Singh leh Chief of Army Staff General Upendra Dwivedi te chungah kan lawm hle,” a ti a. A dang lak belhna tur hmalakna an buaipui leh mek thu leh Mizo thalai a tam thei ang ber hi lut se, eizawnna a nih piah lamah ram venhimna hna a ni tih sawiin, “A zahawm a, nunkawng kaihruaitu tha a ni bawk si a. “Thahnem kan ngai hle a ni,” a ti a. Territorial Army tura vailiam te chu theihtawp chhuah tura a beisei thu a sawi bawk.

He hunah hian Home Minister K. Sapdanga pawhin Territorial Army hian thiamna (Civilian Excellence) leh sipai discipline (Military discipline) tha a keng dun tih sawiin, zahawmna leh hmingthanna a thlen theih bakah nungchang siamthatna te a keng tih a sawi a. He hnaa tling tharte lawmpuiin theihtawp chhuah zui tur leh an mawhphurhnate hlen ngei turin a chah a. Training laia an lo hnual deuh a nih pawhin, 'Kawng bumboh leh harsa hian hmun mawi takah min hruai thin a ni,' tih hre reng turin a chah bawk.

Territorial Army (TA) Establishment & Coordination Committee Chairman Lt. Col. (Retd) Clement Lalhmingthanga pawhin Mizo Territorial Army chu Chief Minister Lalduhoma hmalakna vanga lo awm a nih thu sawiin, kumin September thlaa Advertisement tihchhuah hman an beisei thu a sawi a. TA Group Eastern Command Commander- Shaurya Chakra, Brig. Manoj Kumar Patel pawhin Mizo Territorial Army chu Chief Minister Lalduhoma hmalakna leh a thawhrimna zara lo awm a ni tih sawiin, Territorial Army post ruak a la tam thu leh a theih chuan hnawhkhah zel an duh thu a sawi bawk.