Uttarakhand-ah Mizo hmeichhia 5 chhanchhuak

Mizoram Police leh Women and Child Development Department tangkawp chuan Rudrapur (Uttarkhand) atangin Mizo hmeichhia panga (5) chhanchhuakin he thil kaihhnawihah mi paruk man an ni bawk.

Hemi chungchanga nimin-a Mizoram Police thuchhuah tarlan danin All Women Police Station, Aizawl chuan tun thla May 1, 2026 khan Mizo hmeichhe pakhat hnen atanga FIR dawngin, he hmeichhia hian amah leh a thiannu te chuan Beauty Queen Salon & Spa, Rudrapur, Uttarakhand ah thla khata Rs. 20,000/- hlawha thawhna tur a awm tih hriain, he hmuna thawk tur hian October, 2025 khan an kal a. An kal man senso pawh an thawhna tur Spa neitu hnamdang mi in a lo tihfel sak vek a. An hnathawh tumna hmun an thlen chuan hlawh an hmuh theihna tur chuan mipat hmeichhiatna (extra services) an tih tel ngei ngei a ngai tih an lo hrilh a. Ni khatah dawrtu mi pathum atanga pakua zet neih luihtir an ni a, dawrtu tur an neih dawnin an duh lo chung zu leh ruihhlo chi hrang hrang pein hrai ruih thin an nih thu tarlan a ni a. Hetianga an hmeichhiatna zawrh luihtir an nih hnu pawh hian an hlawh tura an tiam hi pek an ni ngai lova, ei leh in leh an kalna senso rulhna atan cut sak vek zel niin, thla khatah Rs. 500/- chauh te hman tur an pe thin a. An hna bansan an tum hian a chhawrtu te hian phal lovin an tlan chhuah theih loh nan tala-in gate-ah an kalh hnan hial a. Amaherawhchu, April ni 4, 2026 zing khan Tala chu tuboh leh chheni hmanga chhu chhiain an tlan chhuak thei hram a, April 7, 2026 ah Aizawl lo thlengin FIR an thehlut ta a ni.

He report zulzui hian All Women Police Statation-ah thubuai ziahluh niin thubuai chhui tur hian Aizawl South SDPO chu a nih bakah Special Investigation Team (SIT) pawh din nghal a ni a. Mizo hmeichhe dang pawh he suahsualna leh inbumnaa la tang mek an awm tih hriat a nih avangin a chhanchhuak tur leh thilsual titute chunga dan anga action lak a nih theih nan Mizoram Police team leh Women and Child Development Department hnuaia thawktute chuan May 4, 2026 khan Rudrapur, Udham Singh Nagar District, Uttarakhand an pan a. May ni 5, 2026 khan Rudrapur Police-te nen Mizo hmeichhiate thawhna hmun Beauty Salon & Spa hi luhchhuah a ni a. Mizo hmeichhia panga chhanchhuah an ni a, an zingah hian kum tling lo pahnih an tel nghe nghe a ni a. Rudrapur Police Station-ah thubuai dang ziahluh niin thil sual titute, leh nawhchizawrhnaa inhnamhnawih mi paruk man an ni. Heng an mi man zingah hian a bultumtu leh Spa neitu ni bawk hnam dang leh a kawppui Mizo hmeichhia bakah a laizawnnu an tel a ni. He pawikhawihna tuartu Mizo hmeichhia chhanchhuah takte hi Child Welfare Committee, Rudrapur kutah hlan ni tawhin, enkawlna leh counseling pek mek an ni.