Serchhip khawpui chhung kawngpui blakctop hun tur hriat theih a la ni rih lo

Serchhip khawpui chhung paltlangtu kawngpui chu cheitha turin sum ruahman ni tawh mah se blacktop hna tan hun tur erawh hriat ala ni lo.
PWD Serchhip Division-a hotute chuan Serchhip khawpui paltlangtu kawngpui siamtha tur hian cheng vbc. 10 ruahman a nih thu leh hna thawktu tur pawh thlan an nih tawh thu sawiin, tunah hian kawngpui sir-a tuihawk luanna tur leh kawngpui zauh ngai zauh hna thawh mek a ni tih an sawi a. Kawngpui te hi Bituminous concrete hmanga cheithat tur niin May 1 khan hna tan tum a ni a, amaherawh chu khaw awmdan in a zir tak loh avangin hna hi tan a ni ta lo tih an sawi a. Hei mai bakah hian tunhnaiah ram leh ram inepna leh indona avanga kawng siamna atana hman thin bungrua (Bitumen) te India rama lakluh a harsat zui tak avang leh a to avangin kawng siam hna hi tan mai theih a ni ta lo tih an sawi a ni.

PWD Serchhip Division-a thawktute chuan kawng siamna atana hman thin Bitumen hrang hrangte hi tunhnaiah a man a sang nasa hle tih sawiin, a hmaa barrel khat cheng sing khat vel bawr man te pawh cheng sing hnih chuang te a nih tawh thu an sawi a. Kawng siamna tura sum ruahman hi a pun ve rih si loh avang leh an duh leh mamawh ang pawh lakluh tur a awm mai loh avangin Contractor te hian harsatna an tawh mek thu an sawi a ni.

Serchhip khawpui chhung kawngpui sir-a tuihawk paihna tur Side Drain siam hna thawh mek chu KM 5-a thui siam tura ruahman a nih thu PWD hotute chuan LENKAWL an hrilh a, heng Side Drain te hi Culvert-a tuihawk paihna tur a nih avangin PCC hmanga siam a ni tih sawiin, Rod hman ngai lo tura ruahman a ni tih an sawi a. Serchhip Tuikhuah Veng-a nikum lama leimin in kawngpui a tihchhiat, tun thlenga zauh la ni lo chungchanga zawhna pawh chhangin, helai hmun ah hian Box Culvert dah tur a nih thu leh Gabian Wall hmanga dawl tur a nih thu an sawi a, a tirah Box Culvert hi hman mai tur a awm loh avanga harsatna an tawh thu leh tunah hian hna pawh tan thuai thei tura an beisei thu an sawi a ni.

Serchhip leh Thenzawl inkar, Sailiamkawn bul lawka nikum lama leimin, tun thlenga la thenfai loh pawh PWD hotute chuan thenfai a ni dawn hnai nia an hriat thu sawiin, anmahni atang ni lovin ruahmanna dang a awm thu an sawi a ni.